(වියලුව වාර්තාකරු)
පවුලේ උදවිය ද සමග පෝදා පන්සල් ගිය පුද්ගලයෙකු ගමේ හොර අරක්කු තිප්පොළ අසල දී අතුරුදන් වී ටික වේලාවකට පසුව පොලිස් ජීප් රියකින් මතුවූ බව කියැවෙන පුවතක් වාර්තා විය.


 සිද්ධිය මෙසේය.


මතට ලොල් වූවෙකි. පෝය දිනයේ මතට තිත තැබූ හෙතෙම පවුලේ උදවිය ද සමග සවස් ජාමයේ ගමේ පන්සලට ගොඩවූයේ මලක් පහනක් පූජා කර පින් ලබා ගන්නටම නොව අඹු දරුවන්ගෙන් එල්ලවන නෝක්කාඩු ඉවසන්නට බැරි තැනය.


පන්සලේ වත් පිළිවෙත් හමාරවී හෙතෙම පන්සලෙන් පිටතට පැමිණියේ   නායක හිමියන්ට ද වැඳ ආචාර කරමිනි.


සිය පවුලේ උදවිය ද සමග නිවස බලා එද්දී ඔහුට දැක ගන්නට ලැබුණේ ගමේ හොර අරක්කු තිප්පොලෙන් පදමට ගසා පැමිණෙන මිතුරු පිරිසකි.


 හිමින් සීරුවේ පවුලේ උදවියගෙන් මග ඇරුණු හෙතෙම මිතුරු පිරිසට එක්වී හොර අරක්කු තිප්පොළට රිංගා හීන්  අඩියක් ගැසුවේ පන්සල් ගිය කාරණාව ද අමතක කරමිනි.


කෙසේ වෙතත් තමුන් සමග පැමිණි සැමියා සවස් වන තුරුත් නිවසට නොපැමිණීම ගැන සොයා බැලූ_ බිරියට දැන ගන්නට ලැබුණේ මත්පැන් පානය කර නගරයේ සැරි සරද්දී ඔහු පොලීසියට කොටුවී ඇති බවකි.