මීරිගම ප‍්‍රදේශයේ වූ තම ව්‍යාපාරික ආයතනයේම සේවකයකු සමඟ නොගැළපෙන විවාහයක් කර ගැනීම නිසා පියා විසින් මේ දියණිය පවුලෙන් එළවා දමා තිබිණි. ඇයට අනුකම්පා කළේ පියාගේ නංගී වූ නැන්දා පමණි. පසුගියදා නැන්දා ලේලියට කීවේ පියා රිය ගැටුමකට ලක්ව රෝහල් ගතකොට ඇති නිසා ඔහු බැලීමට ගොස් පැරණි අමනාප දුරුකර ගන්නා ලෙසටය. තම බිලිඳු දියණිය සමග තෑගි භෝගද රැගෙන එහි ගිය දියණිය නැන්දා කී ආකාරයට පියාගේ නම කියා රෝහල් වාට්ටුවේ ඇඳ සොයා ගත්තාය. ගෙන ගිය කෑම බීමද එහි තැබුවාය. එහෙත් රෝගියා ඇඳේ නොවීය. අසල වූ අය කීවේ ලෙඩා පවුලේ අයගේ උදවුවෙන් කැසිකිළියට ගොස් ඇති බවකි. මොහොතකින් රෝගියා ඇඳවෙත ආවත් ඇයට දෙවියන් සිහිවූයේ ඒ පියා නොවන හෙයිනි. තොරතුරු විමසීමේදී මේ පියාගේම නම ඇති රෝගියෙකු බවත් පියා ටිකට් කපා පිටව ගොස් ඇති බවත් දැනගත් ඇය තෑගි බෝග එලෙසම තිබියදී ආපසු ගියාලූ.