(නිකවැරටිය ප්‍රියාණි මංගලිකා)
සතිපොළ වෙළෙන්දකුගෙන් කරවල සොරකම් කළ ලොකු නෝනා කෙනකුට එම වෙළෙන්දා කියා දුන් අපූරු පාඩමක් පිළිබඳව පුවතක් නිකවැරටියට ආසන්න පෙදෙසකින් වාර්තා වේ.

සිද්ධිය මෙසේය.

සතිපොළ කරවල වෙළෙන්දාගෙන් නිතර කරවල මිලදී ගන්නා කාන්තාවකි. එදින ද කරවල ගැනීමට පැමිණ ඇත. එසේ පැමිණි කත කරවලවල මිල ගණන් ද විමසමින් තත්ත්වය ද පරීක්‍ෂා කරමින් සිටියේලු.

නෝනාගේ අත වූ ඉටි බෑගය තුළට කරවල කූරියකු රිංගන අයුරු මුදලාලි හොරැහින් දුටුවේ තවත් ගනුදෙනුවක් කරමින් සිටින අතරතුර ය.

සිද්ධිය දුටුව ද නෝනා බොහෝ හිතවත් කෙනකු නිසා කිසිවක් කිරීමට ද මුදලාලිට නොහැකි තත්ත්වයක් උදාවිණි. මුදලාලි වහා ක්‍රියාත්මක වී වෙනත් කරවල කූරියකු ගෙන සොරකම් කළ කරවල වර්ගයේ කූරියන්ට මෙසේ කියමින් තඩි බාන්නට වූයේය.

“තොපි දැන් පොළවල් කීයකට ගියාද? අපූරුවට හිටියා. දැන් තමා මේ එක එකා ගේ බෑග්වලට පනින්නේ. ... බලන්නකෝ නෝනා... මුං මේ පොළට ආවාම දෙන කරදරේ.” කියමින් බොහෝ වේලාවක් තඩි බෑවේලු.

ලැජ්ජාවට පත් නෝනා සොරාගත් කරවල කූරියා සහිත ඉටි බෑගය ද හෙමිහිට බිම දමා සෙනග අතරින් මාරු වී ගියේලු.