දකුණු පළාතේ ප‍්‍රකට දේවාලයක වාර්ෂික පෙරහර පැවැත්වෙන උත්සවයට පසුගිය දා ඔහු ගියේ වන්දනා නඩයක්ද සමගය. අන් අයට කලින් ම පූජා වට්ටි කඩයකට ගිය ඔහු පූජා වට්ටියක් මිලට ගත්තේ සිය මුදල් පැකට්ටුවෙන් රුපියල් හාරසියයක් රැගෙන ය. අනතුරුව දේවාලයට ගිය ඔහුට දැනුණේ සිය මුදල් පසුම්බිය සාක්කුවේ නැති බවය. “මගේ පර්ස් එකට ගහලා” බිරියට පමණක් කී ඔහු අධික ලජ්ජාව නිසා අන් අයට නොකියන ලෙසට ද කීය. එහි රුපියල් අටදහසක් තිබිණි. ආපසු එන ගමනේදී වන්දනා නඩයේ සිටි අයකු හැම දෙනාටම විශේෂ තේ පැන් සංග‍්‍රහයක් කිරීමට ප‍්‍රධාන පෙළේ හෝටලයක් ළඟ වාහනය නැවැත්වීය. සංග‍්‍රහයෙන් පසු ඔහු කීවේ අපූරු කථාවකි. ”මම පූජා වට්ටියක් ගන්න ගියාම පුංචි දරුවෙක් පෙන්නුවා බිම වැටිල තිබුණ පර්ස් එකක්. ඒකෙ කාගෙවත් හැඳුනුම්පතක් තිබුණේ නැහැ. සල්ලි රුපියල් අටදාස් දෙසීයක් තිබුණා. අයිතිකාරයා හොයන්න බැරි නිසා මම සාක්කුවේ දාගත්තා. මේ සංග‍්‍රහය ඒකෙන්” කියා මුදල් පැකට්ටුව පෙන්වූ විට එහි හිමිකරුට දෙවියන් සිහිවුණා ලූ.