සිය බිරිඳගේ ඡන්දය තමන් කැමති අපේක්ෂකයාට හරවා ගැනීමට අපොහොසත් වූ සැමියෙක් උපක්‍රමශීලීව ඇය ඡන්දය දීමෙන් වළක්වාලීමට  ගත් උත්සාහයක් ව්‍යවර්ථ වූ පුවතක් දකුණේ කඳුකර ගම් ප්‍රදේශයකින් අසන්නට ලැබිණි.

එකම වහලක් යට දිවි ගෙවූවත් මෙම අඹු සැමියන් දැරුවේ දේශපාලන මතවාද දෙකකි. එනිසා සෑම මැතිවරණ කාලයකදීම එම නිවස දේශපාලන වාද විවාද  අඬ දබරවලින් උණුසුම් වෙයි.
මෙවරද තත්ත්වය එසේම විය. කොතරම් කරුණු කාරණා කීවත් බලපෑම් කළත් ඇයගේ ඡන්දය තමන් කැමති අපේක්ෂකයා වෙත හරවා ගැනීමට ඔහු අසමත් විය.

මෙයට උපක්‍රමයක් කල්පනා කළ ඔහු මැතිවරණයට ආසන්න සති දෙක තුළ බිරිඳ සමඟ වාද විවාද නොකර දෙදෙනා එක්ව තම ප්‍රධාන ජීවනෝපාය වන තේ ඉඩමේ දලු_ කඩමින් වල් නෙළමින් කාලය ගත කිරීමට තීරණය කළේය. 

මැතිවරණ දිනයේද ඔහු බිරිඳ කැටුව තේ ඉඩමට ගියේය. දහවල් කෑම කා ඡන්දය දැමීමට යමු යැයි බිරිඳ යෝජනා කළාය. නෑ එච්චර කලින් යන්න අවශ්‍ය නෑ, දලු_ටික කඩල දාල තුනට විතර ගියාම ඇති යැයි ඔහු පැවසුවේ කපටිකම සිත තුළ සඟවාගෙනය.

කෙසේ වෙතත් සූදානම් වී දෙදෙනා යතුරුපැදියට නගින විට සවස තුනහමාරට ආසන්න විය.

ඡන්ද පොළට කිලෝමීටර් දෙකක් පමණ තිබියදී යතුරුපැදිය ක්‍රියා විරහිත විය. මාර වැඬේ ස්ටාට් වෙන්නෙ නෑ කියූ ඔහු කීප වාරයක් යතුරුපැදිය පණ ගැන්වීමට ව්‍යාජ උත්සාහයක් කළේය.
තෙල් වසා ඇති බැවින් ක්‍රියාත්මක නොවන බව දන්නේ ඔහු පමණි.

බිරිඳ යතුරුපැදියෙන් බැස පොඩි තල්ලුවක් දැමීමට ඉදිරිපත්වූයේ ඇයගේම කැමැත්තෙනි. ඒ සැණින් තම උපක්‍රමය ක්‍රියාත්මක කිරීමට ඉටා ගත් සැමියා බිරිඳ මඟ දමා මිටෙන් හළ කුරුල්ලෙකු මෙන් ඡන්ද පොළ කරා ඉගිල ගියේ  මෙවර ඡන්දය දැමීමේ කාලය සවස පහ දක්වා දීර්ඝ කර තිබෙන බවක් නොදැන සිටි නිසාය. 

 බලාපොරොත්තු කඩ කර නොගත් බිරිඳ ත්‍රිරෝද රථයක් නතර කරවාගෙන ඡන්ද පොළ කරා ළඟාවන විට සවස හතර පසුවී තිබුණත් ඡන්දය දමා නිවෙසට පැමිණියේ දුම්මල වරම අතට ගෙනලු.
(උණවටුන ඩී.ජී. සුගතපාල)