සෞරග්‍රහ මණ්ඩලයට ඉතා දුරින් පිහිටි මන්දාකිණියකින් විහිදුන ගුප්ත සංඥා කිහිපයක් කැනඩාවේ දුරේක්ෂයක සටහන් වී ඇතැයි තාරකා විද්‍යාඥයෝ පවසති.

 මෙම සංඥා නැවත නැවතත් විහිදී ඇති අතර එවැනි තරංග 13ක් හඳුනාගෙන ඇත.
 කැනඩාවේ බිටිෂ් කොලොම්බියාහි පිහිටි චයිම් නැමැති දුරේක්ෂයේ සටහන් වී ඇති මෙම දත්ත සම්බන්ධව තාරකා විද්‍යාඥයෝ පර්යේෂණ ආරම්භ කර ඇත.
 
 කෙසේ වුවද මෙම තරංග වල ස්වභාවය හෝ එය ඇතිවූ ආකාරය පිළිබඳ තොරතුරු මෙතෙක් අනාවරණය වී නොමැත.
 
මීට පෙර මෙවැනි තරංග හඳුනාගෙන ඇති නමුත් ඒවා නිකුත් වී ඇත්තේ එක් වරක් පමණක් බවද මෙලෙස නැවත නැවතත් විහිදීම අසාමාන්‍ය සිද්ධියක් බවද විද්‍යාඥයෝ සඳහන් කරති.
 
 
එවැනි සංඥා වලට හේතු විය හැකි නියමයන් කිහිපයක් පවතින බව විද්‍යාඥයෝ පවසති.
 
ප්‍රබල චුම්බක ක්ෂේත්‍රයක ස්පන්දනය වන නියුට්‍රෝන තාරකාවක් හෙවත් මියගිය තරුවකින් මෙවැනි තරංග නිකුත් විය හැකිය යන්න එක් මතයකි.
 
තවත් මතයක් වන්නේ නියුට්‍රෝන තාරකා දෙකක් එකිනෙක ගැටීමෙන් මෙවැනි තරංග නිකුත් විය හැකි බවයි. 
 
මේවා පිටසක්වල ජීවින් හෝ යානා විසින් නිකුත් කරන ලද සංඥා වියහැකි බවට ද මතයක් පවතින නමුත් බොහෝ විද්‍යාඥයෝ එම මතය බැහැර කරති.
 
 (බීබීසී ඇසුරිණි - 085)