(නාලක සංජීව දහනායක)
එක්සත් ජාතික පක්‍ෂය සංධානය පිහිටවූ වහාම ජනාධිපතිධූරාපේක්‍ෂකත්වය ලබාගැනීම සදහා කරූ ජයසූරිය මහතා කතානායක තනතුරින් ඉල්ලා අස්වීමට බොහෝ දුරට ඉඩ තිබෙන බව පාර්ලිමේන්තු මන්ත්‍රී (එ.ජ.නි.ස) ලක්‍ෂ්මන් යාපා අබේවර්ධන මහතා අද (21) පැවැසීය.
 
ඒ සමඟම එක්සත් ජාතික පක්‍ෂය පාර්ශව තුනකට කැඩී යාම කිසිවෙකුටත් වැළැක්විය නොහැකි වනු ඇතැයිද ඔහු කීය.
 
මන්ත්‍රීවරයා මෙසේද පැවැසීය.

එමෙන්ම ශ්‍රී ලංකා පොදුජන පෙරමුණ හා ජනතා විමුක්ති පෙරමුණ මේ වනවිටත් ජනාධිපතිවරණ අපේක්‍ෂකයන් නම් කර අවසන් බව කී අබේවර්ධන මන්ත්‍රීවරයා එහෙත් රටේ ප්‍රධානතම දේශපාලන පක්‍ෂය වන එක්සත් ජාතික පක්‍ෂයට මේ වනතුරුත් ජනාධිපතිවරණ අපේක්‍ෂකයකු නම්කර ගැනීමට නොහැකිව තිබෙන බවද කීය.
නව දේශපාලන සන්ධානයක් පිහිටුවීමට ගිවිසුම් අත්සන් කළ වහාම කරූ ජයසූරිය මහතා කතානායක ධූරයෙන් ඉල්ලා අස්වී පක්‍ෂනායක රනිල් වික්‍රමසිංහ මහතාගේ අශීර්වාදය ඇතිව ජනාධිපති අපේක්‍ෂකයා බවට පත්වන බව කී අබේවර්ධන මන්ත්‍රීවරයා ඒ අනුව කරූ ජයසූරිය මහතා විසින් රනිල් වික්‍රමසිංහ මහතාගේ පක්‍ෂනායකත්වය ආරක්‍ෂාකර දෙන බවද පැවැසීය.

අගමැතිවරයා සමග දාම් ඇදීමට හෝ චෙස් ක්‍රීඩාවේ නිරතවීමට කිසිවෙක්ට නොහැකි බව කී අබේවර්ධන මන්ත්‍රීවරයා ජනතාවගේ බලය ලබාගැනීමට රනිල් වික්‍රමසිංහ මහතාට නොහැකි වුවත් පක්‍ෂයේ බලය ලබාගැනීමට ඕනෑම මොහොතක හැකියාව තිබෙන බවද ලක්‍ෂ්මන් යාපා අබේවර්ධන මහතා සදහන් කළේය.
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු ප්‍රධාන කාර්යාලයේදී අද (21) පැවැති මාධ්‍ය හමුවකට එක්වෙමින් මන්ත්‍රීවරයා මේ බව සදහන් කළේය.