(ජයරත්න වික්‍රමාරච්චි)

සාලියවැව අලුත්ගම මංසන්ධියේ දේවස්ථානයට යාබද රථ ගාලක දින 4ක සිට නවතා තිබූ බව කියන යතුරුපැදියක් රැගෙන යාමට අද (24) සවස පැමිණි පුද්ගලයන් දෙදෙනෙකු එම යතුරු පැදියද සමඟ අත් අඩංගුවට ගත් බව සාලියවැව පොලිසිය කියයි.

මෙම යතුරුපැදිය ඉකුත් 20 දින අදාළ රථ ගාලේ අවසරපතක් රැගෙන නවතා ඇති බවත් නමුත් දින 4ක් ගත වී ගියද එය ආපසු රැගෙන යාමට නොපැමිණී බවට ලද තොරතුරකට අනුව ඒ පිළිබදව විමර්ශන සිදුකරමින් පවතින අතුරතුර යතුරුපැදිය රැගෙන යාමට පැමිණි අදාළ පුද්ගලයන් දෙදෙනා සමඟ එම යතුරුපැදිය ද මෙසේ අත් අඩංගුවට ගත් බවත් පොලිසිය පවසයි.

අත් අඩංගුවට ගත් සැකරුවන් දෙදෙනා පුත්තලම ප්‍රදේශයේ පදිංචිකරුවන් බවට මූලික විමර්ශනවලදී අනාවරණය වී ඇති බවත් සිද්ධිය සම්බන්ධයෙන් වැඩිදුර විමර්ශන සිදුකරන බවත් පොලිසිය කියයි.