(නයනජීව බණ්ඩාර)

මඩකලපුව එරාවුර් පුන්නකුඩා මාර්ගයේ ඇති, මෙවර මහමැතිවරණය සඳහා ස්වාධීන පක්ෂයකින් තරග වදින අපේක්ෂකයකුට අයත් ලී මෝලකදි තේක්ක දැව තොගයක්, කැබ් රථයක් සමග සැකකරුවන් 7දෙනෙකු අද(07) අලුයම අත්අඩංගුවට ගත් බව මඩකලපුව වන නිලධාරිහු පැවසූහ.

අත්අඩංගුවට පත් සැකකරුවන් එරාවුර් හා පුන්නකුඩා යන ප්‍රදේශවල පදිංචි වයස අවුරුදු 25ත් 35ත් අතර පසුවන පිරිසකි.

වන නිලධාරින් මෙම වැටලීම කරන මොහොතේ මෙම දැවමඩුවේ හිමිකරු වන, මෙවර මහමැතිවරණය සඳහා ස්වාධීන කණ්ඩායමකින් තරගවදින අපේක්ෂකයා නොසිට ඇති අතර, ඔහු මෙම දැවමඩුව එරාවුර් ප්‍රදේශයේ පුද්ගලයෙකුගෙන් බදු පදනම මත රැගෙන කරවන කෙනෙකු බව අනාවරණය වී තිබේ.

මඩකලපුව දිසාවන නිලධාරි ප්‍රනීත් සුරවීර මහතාට ලැබුනු තොරතුරකට අනුව මෙම වැටලීම කර තිබේ.

වැටලීම සිදුකරන විට සැකකරුවන් ලී මෝලට කැබ්රථයක දැව රැගෙනවිත් ඒවා ඉරමින් සිටිබවත්, එම නීතිවිරෝධී දැවවලින් කොටසක් ඒවා රැගෙන එන ලද කැබ් රථයේ තිබු බවත් වන නිලධාරීහු කීහ.

සැකකරුවන් අද(07) එරාවුර් මහේස්ත්‍රාත් අධිකරණය වෙත ඉදිරිපත්කිරිමට නියමිතය.