(රවින්ද්‍ර විරාජ් අබයසිරි)
 
මාතලේ විජයපාල විද්‍යාලය වෙත පාසල් සිසුන්ට හා ගුරුවරුන්ට ඇතුළුවීම අවහිර කරමින් පොලිසිය විසින්  පිවිසුම් මාර්ගය වසා දැමීමට එරෙහිව විරෝධතාවක් අද(16) මාතලේ නුගගහමුල බස් නැවතුම්පළ ඉදිරිපිටදී පැවැත්විණි.
 
පාසල වෙත කුමාරවිදීය දෙසින් ඇතුළුවීමට ඇති මාර්ගය අවහිර කර ගේට්ටුවක් දැමීමෙන් 2500ක් පමණ වු පාසල් සිසුන්ට කිලෝමීටරයකට වැඩිදුරක් අමතරව ගමන් කිරීමට සිදු වන බවද, කොරෝනා තත්වය හේතුවෙන් පාසල් වසා තිබියදී පොලිස් නිල නිවාස අසලින් විද්‍යාලයට යාමට ඇති එම මාර්ගය  අවහිර කර ගේට්ටුවක් යොදා ඇති බවද,  වහාම එය ඉවත්කරන ලෙසද ඉල්ලා විරෝධතාව පැවැත්වුණි.
 
 විරෝධතාව දෙමාපියන්, ආදි සිසුන් හා ගුරු මණ්ඩලය විසින් සංවිධානය කරන ලදී.
 
 විරෝධතාවට මාතලේ ප්‍රාදේශීය සභා සභාපති කපිල බණ්ඩාර තෙන්නකෝන් මහතාද එක්ව සිටි අතර ඔහු මධ්‍යම පළාත් ආණ්ඩුකාර ලලිත් යු ගමගේ මහතා වෙත දුරකතනයෙන් අමතා ඇතිව ඇති තත්වය පිළිබදව පැහැදිලි කළේය.
 
 අනතුරුව එම මාර්ගය විවෘත කිරීමට කටයුතු කරන ලෙස පොලිසිය වෙත දැන්වූ අතර, මාර්ගය විවර කෙරුණි. ඒ සමගම රැස්ව සිටි පිරිස විසිර ගියහ.