(රංජිත් කරුණාවිර)

මහියංගන ප්‍රාදේශීය සභාවේ සභාවාරය අද (21) යෙදි තිබුණ අතර ප්‍රාදේශිය සභාවේ මන්ත්‍රීවරයෙක් රැකියා ලබාදෙන බවට පොරොන්දු වී මුදල් වංචා කර ඇති බවත් කාන්තාවන් විශාල ප්‍රමාණයක් රවටා අයුතු ප්‍රයෝජන ලබාගෙන ඇති බවත් චෝදනා කරමින් ගම්වාසිහු පිරිසක් සභාව ඉදිරිපිට විරෝධතාවයක නිරතවූහ.

චෝදනා ලැබූ මන්ත්‍රීවරයා සභාවාරය සඳහා පැයක් පමණ ප්‍රමාද වී පැමිණියේ සභාව ඉදිරිපිට ඔහුට විරුද්ධව පිරිසක් විරෝධතාවයේ නිරතවීම හේතුවෙනි.

සභාවාරයේදී එම පිරිස මහජන ගැලරියට පැමිණ  චෝදනා ලැබූ මන්ත්‍රීවරයාට එරෙහිව පුවරු ප්‍රදර්ශනය කරමින් නිහඬ විරෝධතාවයක නිරත වූහ.

විරෝධතාවයේ නිරත පිරිස සභාවාරය ආරම්භයට ප්‍රථම මන්ත්‍රීවරයාගේ වංචාවන් පිළිබඳ සභාපති කරූ වීරරත්න මහාතා හා මන්ත්‍රී කණ්ඩායම දැනුවත් කළේය.

එසේම එම සභාවේ  ශ්‍රි ලංකා නිදහස් පක්ෂයේ ගිරාදුරුකෝට්ට කොට්ඨාශයේ මන්ත්‍රිනී කේ.එම් පත්මලතා මැණිකේ මත්මියගේ සහෝදරයාටද එම මන්ත්‍රීවරයා වැලි තොටුපොළක් ලබාදෙන බවට පවසමින් මුදල් වංචා කර ඇති බවට එම මන්ත්‍රීවරියද චෝදනා එල්ල කළාය.

ප්‍රාදේශිය සභා මන්ත්‍රීවරුන්ගේ මෙවන් දූෂණ වංචාවන් හේතුවෙන් ප්‍රාදේශීය සභා මන්ත්‍රී තනතුරුද අපකිර්තියකට ලක්වන බව පවසමින් සභාවේ වාද විවාද ඇති වී සභාවාරයද උණූසුම් විය.

සභාවාරය ආරම්භකර පැයකට පමණ පසු චෝදනා ලැබූ ශ්‍රී ලංකා නිදහස් පක්ෂයේ මන්ත්‍රීවරයා පැමිණ සභාවාරයට සහාභාගී වූ අතර සභාව තුළට මහියංගන පොලිසියේ ආරක්ෂාවද යොදවා තිබුණි.

මුදල් වංචා කළ බවට චෝදනා ලැබූ මන්ත්‍රීවරයා සභාවේ කටයුතු අවසන් වීමෙන් පසුව පොලිස් ආරක්ෂාව යටතේ පිටව ගිය අතර මන්ත්‍රීවරයා මාධ්‍යට අදහස් දක්වමින් ප්‍රකාශ කර සිටියේ එම වංචාවන්ට තමන් සම්බන්ධ නොමැති බවත් තමාට මඩ ගැසීමට චෝදනා එල්ල කරන බවත් ඒ සම්බන්ධයෙන් තමන් නීතිමය පියවර ගන්නා බවත්ය.