(ඩී.ජී. සුගතපාල)
බෝට්ටුවකින් ගොස් පුපුරණ ද්‍රව්‍ය යොදා මුහුදේ මසුන් මැරීමට සූදානම්වු පුද්ගලයින් තිදෙනෙකු නාවික හමුදාව විසින් අත්අඩංගුවට ගෙන වැඩිදුර පරීක්ෂණ සඳහා ධීවර හා ජලජ සම්පත් දෙපාර්තමේන්තුවේ විමර්ශන අංශය වෙත බාරදී තිබේ.

මෙම පුද්ගලයින් තිදෙනා ඊයේ (24) රාත්‍රී දොඩන්දූව ප්‍රදේශයේ මුහුදේදි ඩයිනමයිට් නමැති පුපුරණ ද්‍රව්‍ය යොදා මසුන් මැරීමට සූදානම් වන බවට ලැබුණු තොරතුරක් අනුව ගාල්ල දක්ෂිණ නාවික හමුදා කඳවුරේ නිලධාරින් පිරිසක් විසින් අත්අඩංගුවට ගෙන ධීවර හා ජලජ සම්පත් දෙපාර්තමේන්තුවට බාරදී ඇත.

සැකකරුවන් මේ වනවිට ධීවර හා ජලජ සම්පත් දෙපාර්තමේන්තුවේ ප්‍රධාන කාර්යාලයේ රඳවාගෙන ප්‍රශ්න කරමින් සිටින බවත් සැකකරුවන් ගොස් ඇති යාත්‍රාව ලියාපදිංචි කර නැති බවත් නාවික හමුදාව විසින් යාත්‍රාව වැටලීමත් සමග එහි තිබූ පුපුරණ ද්‍රව්‍ය මුහුදට දමා ඇති බවට අනාවරණයවි ඇති බවත්  ධීවර දෙපාර්තමේන්තුව පවසයි.

ධීවර දෙපාර්තමේන්තු අධ්‍යක්ෂ ජනරාල් ගිනිගේ ප්‍රසන්න කුමාර මහතාගේ සහ විමර්ශන අංශයේ අධ්‍යක්ෂිකා සුමනා එදිරිවීර මහත්මියගේ උපදෙස් පරිදි ගාල්ල සහකාර අධ්‍යක්ෂ කේ.එල් ගාමිණි මහතාගේ අධික්ෂණය  යටතේ කොළඹ ප්‍රධාන කාර්යාලයේ වැටලිම් විමර්ශණ අංශයේ ප්‍රධානි එන්.එන්.ඩී.එස්.යූ.පරණවිතාන මහතා ඇතුලු නිලධාරි කණ්ඩායමක් විසින්  වැඩිදුර පරීක්ෂණ පවත්වා ගෙන යනු ලැබේ.