(රංජිත් රාජපක්ෂ) 

කොවිඩ් 19 වයිරසය ආසාදනය වු අපරාධ විමර්ෂණ දෙපාර්තුමේන්තුවේ නිලධාරියෙකු නුවරඑළිය අධිකරණ සංකීර්ණයට පැමිණීම නිසා නුවරඑළිය මහාධිකරණය, දිස්ත්‍රික් අධිකරණය සහ මහෙස්ත්‍රාත් අධිකරණයේ නඩු කටයුතු 16 වැනිදා දක්වා තාවකාලිකව අත්හිටුවන ලෙස එම අධිකරණ භාර විනිසුරුවරුන්ගෙන් අද (04) ඉල්ලීමක් කළ බව නුවරඑළිය නීතිඥය සංගමයේ සභාපති නීතිඥ ගාමිණි සේනානායක මහතා පැවසීය.
 

නුවරඑළිය නීතිඥය සංගමයේ විශේෂ රැස්විමක් අද පැවැත්වු බවත්, එහිදි සියලු නීතිඥ්‍යවරුන් ඒකමතික තීරණය කරනු ලැබුවේ අධිකරණ කටයුතු 16 දින දක්වා තාවකාලිකව අත්හිටුවන ලෙස විනිසුරුවරුන්ගෙන් ඉල්ලීමක් කිරීමට බවත් ගාමිණි සේනානායක මහතා කියා සිටියේය.
 
මේ සම්බන්ධයෙන් එම විනිසුරුවන් තිදෙනාගෙන් එම ඉල්ලීම කල බවත්, එම ඉල්ලීම අධිකරණ සේවා කොමිසන් සභාව වෙත ඉදිරිපත් කර අධිකරණ සේවා කොමිසන් සභාවේ උපදෙස් පරිදි ඉදිරි කටයුතු කරන බවට එම විනිසුරුවන් තිදෙනා තම සංගමයට දැනුම් දෙන බව පැවසු බවයි ගාමිණි සේනනායක මහතා කියා සිටියේය.
 
අපරාධ විමර්ෂණ දෙපාර්තුමේන්තුවේ නිලධාරියෙකු ඉකුත් මස 26 දින නඩු කටයුත්තක් සදහා තම අධිකරණ සංකීර්ණයට පැමිණ පසුව එම නිලධාරියා කල පි.සි.ආර්. වාර්තාව අනුව ඔහුට කොවිඩ් 19 වෛරසය අසාදනය වි ඇති බවට තහවුරු විමෙන් පසු අපරාධ විමර්ෂණ අංශයේ නිලධාරියා එ බව නුවරඑලිය පොලිසියට දැනුම් දි ඇති බවද ගාමිණි සේනානායක මහතා පැවසිය.
 
නුවරඑලිය අධිකරණ සංකිර්ණය නුවරඑලිය මහ නගර සභාවේ සෞඛ්‍යය අංශ විසින් විෂබිජහරණයටද ලක් කෙරිණ.