(ටී.කේ.ජී.කපිල )
ඕමානයේ සිට විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන ආ ශ්‍රී ලාංකික ගුවන් මගීන් සිව් දෙනෙකු අද (16)  කටුනායක ගුවන් තොටුපළ පැමිණීමේ පර්යන්තයේ දී රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අත් අඩංගුවට ගෙන ඇති බව රේගු මාධ්‍ය ප්‍රකාශක , අතිරේක රේගු අධ්‍යක්ෂ ජනරාල් සුනිල් ජයරත්න මහතා පැවසීය .

කිරිබත්ගොඩ , කුරුණෑගල  පදිංචි කාන්තාවන් තිදෙනකු ,බේරුවල ප්‍රදේශයේ පදිංචි පිරිමි ගුවන් මගියෙකුත් මෙසේ රේගු අත්අඩංගුවට පත් වී තිබේ.

කුරුණෑගල ප්‍රදේශයේ පදිංචි එක්  කාන්තාව , මීට පෙර අවස්ථාවකදී ද ශ්‍රී ලංකාවට නීතිවිරෝධී ලෙස දුම්වැටි තොගයක් රැගෙන පැමිණීමේ දී කටුනායක ගුවන් තොටුපළේ දී රේගු නිලධාරීන්ට හසු වූ කාන්තාවක් බව රේගුව සදහන් කරයි .
 

 අද(16)  ඕමානයේ සිට පැමිණි , ඕමාන් ගුවන් සේවයේ ඩබ්ලිව්.වයි.- 0381 දරණ ගුවන් යානයෙන් කටුනායක ගුවන් තොටුපළ වෙත පැමිණ තිබේ .

 ඔවුන් විසින් රැගෙන පැමිණි ගමන් මලු තුළ , දුම්වැටි වර්ග 03 කට අයත් , රුපියල් 52,47,800 ( පනස් දෙලක්ෂ හතලිස් හත් දහස් අට සීයයක්) ක් වටිනා දුම්වැටි 90,000 ක් අඩංගු , දුම්වැටි කාටූන් 450 ක් සගවා ගෙන තිබී රේගු නිලධාරීන් අත් අඩංගුවට ගත් බව රේගු මාධ්‍ය ප්‍රකාශකවරයා වැඩිදුරටත් සදහන් කළේය .