(ඔගස්ටින් ප්‍රනාන්දු)

හලාවත, මුගුණුවටවන කරවිටාගාර වීර කැළේවත්ත ප්‍රදේශයේ කොහු සකස් කිරීමේ මට්ට වළක තිබී මළ සිරුරක් අද (28) හමුවූ බව හලාවත පොලිසිය කියයි.

මිය ගොස් ඇත්තේ බිංගිරිය බෝවත්ත වදුරැස්ස ප්‍රදේශයේ පදිංචි සරා හෙවත් මල් සරා නමින් හැඳින්වෙන පුද්ගලයෙකි. මිය ගිය අය සම්බන්ධයෙන් වෙනත් විස්තරයක් මෙතෙක් හෙළි වි නැති බවත් පොලිසිය කියයි.

මිය ගිය අය පන්කොළ පෙට්ටි පැදුරු ගමින් ගමට ගෙන යමින් විකුණු අයෙකු වන බවත් ඔහු කරවිටාගාර ප්‍රදේශයට පැමිණ අලෙවි කටයුතුවලින් පසු  දින කිහිපයක් ප්‍රදේශයේ නතරවී සිටින බවත් දිනපතා අධික ලෙස මත්පැන් පානය කර ගීත ගයමින් තැනින් තැන යන බවත්, අනාවරණය වී ඇත.

ඔහු ඊයේ (27 ) රාත්‍රියේ ද ගම පුරා ගී ගයමින් සැරිසරමින් සිටි බවද පොලිසිය කියයි.

අද උදෑසන මළසිරුර දුටු ප්‍රදේශවාසීන් ඒ බව පොලිසියට දන්වා ඇත.

සිරුර පශ්චාත් වෛද්‍ය පරීක්ෂණයක් සඳහා හලාවත දිස්ත්‍රික් මහ රෝහලට ගෙනයාමට නියමිතව ඇත‍.

හලාවත මූලස්ථාන පොලිසිය පරීක්ෂණ පවත්වයි.