(*** නාලක සංජීව දහනායක)

ද්විත්ව පුරවැසියකුට මැතිවරණයක දී ඡන්දය ප්‍රකාශ කිරීමට අයිතිය ඇත්නම් ඔවුන්ට මන්ත්‍රී ධුරයක් දැරීමට ද අවස්ථාව තිබිය යුතු බව බදුල්ල දිස්ත්‍රික් පාර්ලිමේන්තු මන්ත්‍රී ඩිලාන් පෙරේරා මහතා ඊයේ (2) පැවැසීය.

බත්තරමුල්ල,නෙළුම් මාවතේ පිහිටි ශ්‍රී ලංකා පොදුජන පෙරමුණු ප්‍රධාන කාර්යාලයේ දී ඊයේ (2) පැවැති මාධ්‍ය හමුවකට එක්වෙමින් හෙතෙම මේ බව සඳහන් කළේය.

මන්ත්‍රීවරයා මෙසේද පැවැසීය.

ජනාධිපති ගෝඨාභය රාජපක්‍ෂ මහතාගේ රජයේ පළමු ව්‍යාපෘතිය වන රැකියා දස ලක්‍ෂයක් ලබාදීමේ වැඩපිළිවෙළ ප්‍රාදේශීය ලේකම් කොට්ඨාස මට්ටමින් මේ වනවිට ආරම්භ කර තිබෙනවා. තමන්ගේ උපාධියට සරිලන අන්දමේ රැකියාවක් සොයාගැනීම උපාධිධාරීන්ට ලොකු ගැටලුවක් වෙලා තිබුණා. රැකියා ලබාගැනීම සඳහා උද්ඝෝෂණ කරන්න, උපවාස කරන්න ඔවුන්ට සිදුවුණා. සියලුම උපාධිධාරීන්ට රැකියා ලැබෙන බැවින් මින් ඉදිරියට උද්ඝෝෂණ, උපවාස පවත්වන්න උපාධිධාරීන්ට සිදුවන්නේ නැහැ. අනාගතයේදී ඩිප්ලෝමාධාරීන්ට මෙන්ම රාජ්‍ය සේවයේ සිටින පුහුණු උපාධිධාරීන්ටත් රැකියා ලබාදීම සම්බන්ධයෙන් රජය ඉතාම ඉක්මනින් කටයුතු කරනවා.

එමෙන්ම 19 වැනි ආණ්ඩුක්‍රම ව්‍යවස්ථා සංශෝධනය අහෝසි කෙරෙමින් ගෙනෙන 20 වැනි ආණ්ඩුක්‍රම ව්‍යවස්ථා සංශෝධනය ඉතාම ඉක්මනින් පාර්ලිමේන්තුවට ඉදිරිපත් කිරීමට රජය බලාපොරොත්තු වෙනවා. 19 වැනි ආණ්ඩුක්‍රම ව්‍යවස්ථා සංශෝධනය සංශෝධනය කරනවා මෙන්ම ඉතාම ඉක්මනින් රටට ගැළපෙන ආකාරයේ නව ආණ්ඩුක්‍රම ව්‍යවස්ථාවක් අපි සම්මත කරගත යුතුයි. විධායකය, ව්‍යවස්ථාදායකය හා අධිකරණය යන බලකේන්ද්‍රයන් තුනේම ස්වාධීනත්වය ආරක්‍ෂා වන ආකාරයට එය සකස් කළ යුතුයි. වත්මන් ආණ්ඩුක්‍රම ව්‍යවස්ථාවට වැඩිම සංශෝධන ප්‍රමාණයක් එක්කර තිබෙන්නේ එක්සත් ජාතික පක්‍ෂයයි. ඒ බොහෝමයක් සංශෝධන ඉදිරිපත් කර තිබෙන්නේ තමන්ගේ පුද්ගලික අරමුණු ඉටුකරගන්නයි. නමුත් 13, 17, 19 වැනි ව්‍යවස්ථා සංශෝධනවල දෝෂ සහිත තැන් තිබුණත් ඒවායේ හොඳ ලක්‍ෂණත් තිබෙනවා.

නව ආණ්ඩුක්‍රම ව්‍යවස්ථා සංශෝධනයට මෙන්ම පවතින මැතිවරණ ක්‍රමය වෙනස් කිරීමටත් අපගේ රජය මූලිකත්වය ගෙන ක්‍රියාකරනවා. අපි 19 වැනි ආණ්ඩුක්‍රම ව්‍යවස්ථා සංශෝධනයට අත ඉස්සුවේ එක්සත් ජාතික පක්‍ෂ ආණ්ඩුව 20 වැනි ආණ්ඩුක්‍රම ව්‍යවස්ථා සංශෝධනය ගෙනඑන බව කියූ නිසයි. නමුත් මෛත්‍රී - රනිල් දෙදෙනාම ඒ පොරොන්දුව මහදවල් කැඩුවා. අපිට අලුත් මැතිවරණ ක්‍රමයක් අවශ්‍යයි. කේවල හා සමානුපාතික ක්‍රම මිශ්‍රවූ නව මැතිවරණ ක්‍රමයක් රටට අවශ්‍යයි. මේ මැතිවරණ ක්‍රමය වෙනස් වුණොත් ආසනයට වගකියන මන්ත්‍රීවරයෙක් පත්වනවා මෙන්ම විවිධ ජනකොටස්වලටත් මන්ත්‍රීවරුන් පත්කරගන්න පුළුවන්.

එමෙන්ම 19 වැනි ආණ්ඩුක්‍රම ව්‍යවස්ථා සංශෝධනය මගින් ද්විත්ව පුරවැසි බව සහිත පුද්ගලයකුට මන්ත්‍රී ධුරයක් දැරීම අහිමිකර තිබෙනවා. ද්විත්ව පුරවැසියෙකුට ඡන්දය ප්‍රකාශ කරන්න පුළුවන්නම් මන්ත්‍රී ධුරයක් දරන්න බැරි ඇයි කියල මට තේරෙන්නෙ නැහැ. ද්විත්ව පුරවැසි බව පිළිනොගන්නා රටවල් තිබෙනවා. නමුත් අපේ රටේ ද්විත්ව පුරවැසි බව පිළිගන්නවා වගේම ඔවුන්ට ඡන්ද අයිතියත් ලබාදී තිබෙනවා. නමුත් ඡන්දය ඉල්ලීමේ අයිතිය අහිමිකර තිබෙනවා. ඒ තර්කය පරස්පරයි. ඔවුන් ඒ වෙලාවෙදි 19 වැනි ආණ්ඩුක්‍රම ව්‍යවස්ථා සංශෝධනයට ඒ වගන්තිය දැම්මේම ගෝඨාභය රාජපක්‍ෂ මහතා ඉලක්ක කරගෙනයි.

ද්විත්ව පුරවැසියෙක් රටේ පාලකයෙක් වුණොත් පුරවැසි බව තිබෙන රටවල් දෙක අතර යම් ප්‍රශ්නයක් වුණොත් ඔහු ගන්නා ස්ථාවරය සම්බන්ධයෙන් ප්‍රශ්නයක් ඇතිවන බව ඇතැම් අය කියනවා. වෙනත් රටක පුරවැසිබව ඉල්ලනකොට තමන්ගේ රටේ පුරවැසිබව ඉවත්කර ගත්තේ නැහැයි කියන්නේ ඔහු තමන්ගේ රටට වැඩි කැමැත්තක් දක්වනවා කියන එකයි. ද්විත්ව පුරවැසිබව තිබුණත් ඔහු රටේ පාලකයා වෙන්නේ ජනතාවගේ කැමැත්තෙනුයි. අලුත් ආණ්ඩුක්‍රම ව්‍යවස්ථාවක් ගෙන ඒමේ දී තුන්දොස් සමනය වන ආකාරයට එය ගෙන ආ යුතුයි. සියලුම ක්‍ෂේත්‍ර ආවරණය වන ආකාරයට එය සකස් නොකළොත් නැවැත ප්‍රශ්න ඇති වෙන්න පුළුවන්.

එමෙන්ම මෙතෙක් කල් සිටි රාජ්‍ය නායකයන් මත්ද්‍රව්‍ය ජාවාරම හා පාතාලය මැඩපවත්වන්න කටයුතු කළේ වචනයෙන් විතරයි. නමුත් ගෝඨාභය රාජපක්‍ෂ මහතා කටින් බතල හිටවන්නේ නැතුව ඒවා මහපොළවේ යථාර්ථයක් බවට පත්කර තිබෙනවා. එල්.ටී.ටී.ඊ ත්‍රස්තවාදයටත් වඩා පාතාලය හා මත්ද්‍රව්‍ය ජාවාරම ප්‍රබලයි. මත්ද්‍රව්‍ය ජාවාරමට හා පාතාලයට සම්බන්ධ හාල්මැස්සෝ වෙනුවට දැන් තෝරු මෝරු අල්ලනවා. ඒ ජාවාරම්වලට සම්බන්ධ බන්ධනාගාර නිලධාරීන් මෙන්ම පොලිසියේ හා ආරක්‍ෂක නිලධාරීන්ටත් තරාතිරම නොබලා දඬුවම් ලබාදෙන බවද සඳහන් කළේය.

කොළඹ දිස්ත්‍රික් පාර්ලිමේන්තු මන්ත්‍රී මධුර විතානගේ මහතා ද මෙහිදී අදහස් දැක්වීය.