(ඉන්දිකා රාමනායක)

ආබාධිත රණවිරුවන්ගේ ගැටලු විසදීමට ජනාධිපති මෛත්‍රීපාල සිරිසේන මහතා විසින් ඊයේ (17) විශේෂ කැබිනට් පත්‍රිකාවක් අත්සන් කර ඇති බවත් ඒ වෙනුවෙන් සුළු කාලයක් ඉවසිලිවන්තව කටයුතු කරන ලෙසත් හමුදාපති ලුතිනන් ජනරාල් ශවේන්ද්‍ර සිල්වා මහතා අද (18) ආබාධිත රණවිරු නියෝජිතයන්ගෙන්  ඉල්ලා සිටියේය.

හමුදාපතිවරයා රණවිරු නියෝජිතයන් තිදෙනකු යුද හමුදා මූලස්ථානයට කැඳවා ඔවුන්ගේ ගැටලු සම්බන්ධයෙන්  සාකච්ඡා කිරීමෙන් පසු මේ බව සඳහන් කර තිබේ.

තමන් ද රණබිමේ දී තුවාල ලැබූ නිලධාරියෙකු බවත්  එම තුවාල වලින් පීඩා වින්ද  බවත් තමන්  රණවිරුවන් ගැන දැඩි සැලකිල්ලක් දක්වන බවත් හමුදාපතිවරයා කියා සිටියේය.

හමුදාපතිවරයා වශයෙන් තමන්  යුද හමුදාවේ සියලුම සාමාජිකයින්ට තමන්ට හැකි උපරිමයෙන් සාධාරණයක් ඉටුකිරීමට කටයුතු කරන බවද හමුදාපතිවරයා එහිදී සඳහන් කළේය.