බංග්ලාදේශයට ඇතුළු වීමට නියමිත ‘බුල්බුල්‘ සුළි කුණාටුව හේතුවෙන් වෙරළබඩ ප්‍රදේශවල 100,000ක පමණ පිරිසක් වෙත ඉවත්වීමේ නියෝග නිකුත් කර තිබේ.

සෙනසුරාදා(09) සවස් කාලයේ කුණාටුව රට තුළට ඇතුළු වනු ඇති බවත් මුහුදු රළ අඩි 7ක් තරම් උසට නැගෙනු ඇති බවත් අපේක්ෂා කෙරේ.

පහත් බිම්වල පිහිටි දිස්ත්‍රික්ක 12කට පමණ අනතුරු ඇඟවීමේ නිවේදන නිකුත් කර ඇති අතර මොංග්ලා සහ චිතගොන් ඇතුළු වරායන් ගණනාවක් සඳහාද අනතුරු අඟවා ඇත.

ලොව විශාලතම කඩොලාන වනාන්තරය සහ වඳවීමේ තර්ජනයට මුහුණපා සිටින බෙංගාල කොටින්ගේ නිවහන වන සුන්ඩර්බන්ස් ආසන්නයෙන් කුණාටුව රට තුළට ඇතුළුවනු ඇතැයි කාළගුණ අංශ සඳහන් කරයි.

පැයට කිලෝමීටර් 120ක පමණ වේගයෙන් සුළං හමායනු ඇතැයි ද ඔවුහු පවසති.

ස්වෙච්ඡා සේවකයින් විසින් ගෙයින් ගෙට ගොස් කුණාටුව සම්බන්ධව ජනතාව දැනුවත් කර ඇත.

(බීබීසී ඇසුරිණි - 085)