( තිළිණි ද සිල්වා සහ රංජන් කටුගම්පොළ )

අධ්‍යාපන අමාත්‍ය මහාචාර්ය ජී. එල්. පීරිස්, එම අමාත්‍යාංශ ලේකම් මහාචාර්ය කපිල පෙරේරා, විශ්ව විද්‍යාල ප්‍රතිපාදන කොමිෂන් සභාවේ සභාපති ජ්‍යෙෂ්ඨ මහාචාර්ය සම්පත් අමරතුංග ඇතුළු පිරිසකට අභියාචනාධිකරණය අද (27) නොතීසි නිකුත් කළේය.

අධ්‍යයන පොදු සහතික පත්‍ර උසස් පෙළ  සදහා පැරණි සහ නව නිර්දේශ ලෙස කරන ලද වර්ගීකරණය මත සහ දිස්ත්‍රික් පංගු ක්‍රමය මත පදනම්ව විශ්ව විද්‍යාල වලට සිසුන් ඇතුළත් කර ගැනීමට බලධාරීන් ගෙන ඇති තීරණය ක්‍රියාත්මක වීම වළක්වන ලෙස ඉල්ලා ගොනු කර ඇති රිට් පෙත්සමක් සම්බන්ධයෙන් කරුණු දැක්වීම සඳහා ලබන මාර්තු මස 10 වැනිදා අධිකරණයේ පෙනී සිටින්නැයි මෙලෙස නොතීසි නිකුත් කර තිබේ.

මෙම  ක්‍රමවේදය නිසා වෛද්‍ය පීඨයට ඇතුළත් වීමට අපේක්ෂා කළ තමන්ට අසාධාරණයක් වූ බව පවසමින් 2019 වසරේ දී අ.පො.ස.උසස් පෙළ විභාගයට ජීව විද්‍යා විෂයන් සදහා පෙනී සිටි සිසුවියක් ගොනු කළ රිට් පෙත්සමක් සළකා බලමින් අධිකරණය මෙම නොතීසි නිකුත් කෙරිණි.

සෝභිත රාජකරුණා ධම්මික ගනේපොල යන අභියාචනාධිකරණ විනිසුරු මඩුල්ල හමුවේ මෙම පෙත්සම කැඳවිණි.

ජීව විද්‍යා අංශයෙන් නව නිර්දේශය යටතේ අ.පො.ස.උසස් පෙළ විභාගයට පෙනී සිටි අම්බලන්ගොඩ ප්‍රදේශයේ පදිංචි කේ.සනුමි තරින්දයා ද සිල්වා විසින් මෙම පෙත්සම් ගොනු කරඇත.

අධ්‍යාපන ඇමැතිවරයා, එම අමාත්‍යාංශ ලේකම්වරයා,විශ්ව විද්‍යාල ප්‍රතිපාදන කොමිෂන් සභාව, එම සභාවේ සභාපතිවරයා, විභාග කොමසාරිස් ජනරාල්, සනත් පූජිත, නීතිපවරයා මෙහි වගඋත්තරකරුවන් ලෙස නම් කරනු ලැබ සිටිති.

පෙත්සම්කාර ශිෂ්‍යාව වෙනුවෙන් නීතීඥවරුන් වන මිගාර ඩෝස්, සහ දිනේශ් ද සිල්වා යන මහත්වරුන් පෙනී සිටියහ.