(තිළිණි ද සිල්වා සහ රංජන් කටුගම්පොළ)
 
මිනුවන්ගොඩ ප‍්‍රදේශයේ සිදු වූ කලහකාරී සිදුවීම් සම්බන්ධයෙන් තමන් අත්අඩංගුවට ගැනීමට සූදානමක් පවතින බව සඳහන් කරමින් තමන් අත්අඩංගුවට ගැනීම වළකාලන අතුරු නියෝගයක් නිකුත් කරන ලෙස ඉල්ලා පිවිතුරු හෙළ උරුමයේ නියෝජ්‍ය නායක මධුමාධව අරවින්ද මහතා ශ්‍රේෂ්ඨාධිකරණය හමුවේ අද (23) මූලික අයිතිවාසිකම් පෙත්සමක් ගොනු කරන ලදී.
 
මධුමාධව අරවින්ද මහතා විසින් ගොනු කර ඇති මෙම පෙත්සමේ වගඋත්තරකරුවන් හැටියට මිනුවන්ගොඩ පොලිස් ස්ථානාධිපති අජිත් ප‍්‍රියන්ත, බස්නාහිර උතුර භාර නියෝජ්‍ය පොලිස්පති දේශබන්දු තෙන්නකෝන්, පොලිස්පති පූජිත් ජයසුන්දර යන මහත්වරුන් සහ නීතිපති නම් කරනු ලැබ සිටිති.
 
නීතීඥ තුෂාර දිසානායක මහතා මාර්ගයෙන් ගොනු කර ඇති පෙත්සමේ මෙසේද සඳහන් වේ.
 
‘‘පෙත්සම්කරු පිවිතුරු හෙළ උරුමය නියෝජ්‍ය නායක සහ ගම්පහ දිස්ත‍්‍රික් සංවිධායකවේ.2011 සිට 2014 වසර දක්වා කාලය තුළ පෙත්සම්කරු කොළඹ නගර සභාවේ නාගරික මන්ත‍්‍රීවරයෙකු හැටියට කටයුතු කළේය.
 
පෙත්සම්කරු පසුගිය මස 11 සහ 12 වැනිදින අත්තනගල්ල ,වේවැල්දෙණිය , මීරීගම , ඉඹුල්ගොඩ සහ අලවල යන ප‍්‍රදේශයන්හි මේ වසර අවසානයේ පැවැත්වීමට නියමිතව ඇතැයි කියන ජනාධිපති මැතිවරණය සඳහා ප‍්‍රචාරක රැස්වීම් සංවිධානය කළේය.
 
මේ අතර දිවුලපිටිය ප‍්‍රදේශයේ ඉදිරි දිනයන්හි රැස්වීම් පැවැත්වීම සඳහා ව්‍යාපාරිකයෙකු වන නාලක සමරතුංග නැමැති මිතුරු හමුවීම සඳහා පෙත්සම්කරු මෙම මස 13 වැනි දින පස්වරු 7.00ට ඔහුගේ නිවසට ගියේය.
 
මෙම ගමනට පෙත්සම්කරුවන්ගේ මිතුරන් කීහිපදෙනෙකුද එක් විය.පෙත්සම්කරු සිය මෝටර් රථයෙන් ව්‍යාපාරික නාලක සමරතුංග මහතාගේ නිවසට ගොස් ඔහුත් සමඟ දිවුලපිටය බලා පිටත් විය.දිවුලපිටිය නගරයට යායුත්තේ මිනුවන්ගොඩ නගරය පසු කරගෙනය. මිනුවන්ගොඩ නගරයට ළගා වෙන විට විශාල රථවාහන තදබදයකට මුහුණ දුන්නේය.පෙත්සම්කරු තම රථයෙන් බැස ඒ පිළිබඳ විමසීය.
 
එහිදී මිනුවන්ගොඩ නගරයේ කලබලකාරී තත්ත්වයක් ඇති වී ඇති බව දැනගන්නට ලැබිණි. මේ අවස්ථාවේදී පෙත්සම්කරුව යම් කිසිවෙකු තමන්ව වීඩියෝ ගත කර ඇති බව දැනගන්නට ලැබිණි. ඒ අවස්ථාවේදී පෙත්සම්කරු ඇද සිටියේ ජාතික ඇඳුමය.
 
පසුදින පෙත්සම්කරු මෙම කලහයට සහභාගීවී ඇති බව සඳහන් කරමින් මෙම වීඩියෝ පටය සමාජ මාධ්‍ය හරහා ප‍්‍රචාරය විය. මෙම වීඩියෝ පටය දුෂ්ඨ චේතනාවෙන් නියෝජ්‍ය අමාත්‍ය එඩ්වඩ් ගුණසේකර මහතා විසින් මෙලෙස භාවිත කර ඇති බව පෙත්සම්කරු කියා සිටී‍.