ගාල්ලේ කොටු පවුර මත සිටිමින් ශී‍්‍ර ලංකා - එංගලන්ත කි‍්‍රකට් තරගය නරඹමින් සිටි එංගලන්ත ජාතිකයකු වන රොබට් ලූවිස් මහතා එම ස්ථානයෙන් ඉවත් කිරීමට ගාල්ල පොලිසිය පියවර ගෙන ඇත.

මේ සම්බන්ධයෙන් ගාල්ල පොලිසියෙන් කළ විමසීමකදී ගාල්ල මූලස්ථාන පොලිස් පරීක්‍ෂක කපිල සේනාපති ද සිල්වා මහතා පැවසූයේ තරගය නැරඹීම සඳහා ගාලූ කොටු පවුර මතට මහජනතාව රොක්වන බැවින් තරගය නැරඹීමට එහි යන සියලූ දෙනාම ඉන් ඉවත් කිරීමට පියවර ගත් බවයි.

එංගලන්තයේ සුප‍්‍රකට කි‍්‍රකට් ලෝලීන් පිරිසක් වන ‘බාමි ආමි’ සමාජයේ සාමාජිකයකු වන රොබට් ලූවිස් මහතා ශී‍්‍ර ලංකා - එංගලන්ත කි‍්‍රකට් තරගාවලිය නැරඹීම සඳහා මාස ගණනාවක් ශී‍්‍ර ලංකාවේ රැදී සිටි අයෙකි.

ඔහු පසුගිය මාර්තු මාසයේදී එංගලන්ත කණ්ඩායම ශී‍්‍ර ලංකාවට පැමිණි ගුවන් යානයෙන්ම ශී‍්‍ර ලංකාවට පැමිණියේය. එහෙත් කොරෝනා වයිරසය ලෝකය පුරා ව්‍යාප්ත වීමත් සමගම පුහුණු තරගය අතරමග නතර කරදමා එංගලන්ත කණ්ඩායම ආපසු එංගලන්තයට ගියේය.

තමන්ගේ කණ්ඩායම ආපසු සියරට බලා ගියද එදා සිටම ශී‍්‍ර ලංකාවේ නතර වී සිටි රොබට් ලූවිස් මහතා ශී‍්‍ර ලංකාවේ පැවැති ඇඳිරී නීති සහ අගුළු දැමීම් සියල්ලටම මුහුණ දුන්නේය. වෘත්තීය වශයෙන් අන්තර්ජාල සැලසුම් ශිල්පියකු ලෙසින් කටයුතු කරන රොබට් ලූවිස් මහතා සිය රටෙන් සැතපුම් 5,400 ක් (කිලෝ මීටර 8,700 ක්)  ඈත සිට සේවය කරමින්ම ශී‍්‍ර ලංකාවේ රැඳී සිටියේ එංගලන්ත කණ්ඩායම නැවතත් ශී‍්‍ර ලංකාවට පැමිණෙනතුරුය.

එංගලන්ත කණ්ඩායම පසුගිය 3 වැනිදා නැවතත් ශී‍්‍ර ලංකාවට පැමිණි අතර තරගය ආරම්භ වීමට දින කිහිපයකට පෙරම ගාලූ කොටු පවුර වෙත ගිය රොබට් ලූවිස් මහතා තමන් තරගය නරඹන්නේ කොතැන සිටද යන්නත් කල්තබාම සනිටුහන් කරගෙන සිටියේය. ඒ වසර 1883 දී ඉංගී‍්‍රසි ජාතිකයන් විසින්ම ඉදිකරන ලද ගාලූ කොටු පවුරේ සුප‍්‍රකට ඔරලෝසු කණුව පාමුල ස්ථානයකි. එහෙත් තරගය ආරම්භ වූ අද (14 වැනිදා) උදෑසන පොලිසියේ නියෝග මත ඔහුට ගාලූ කොටු පවුර මතින් බිමට බැසීමට සිදුවිය.

රොබට් ලූවිස් මහතාට ගාලූ කොටු පවුර මතින් බිමට බැසීමට සිදුවූවද, එංගලන්තයේ සිට පැමිණි කි‍්‍රකට් විස්තර විචාරකයෝ ගාලූ කොටු පවුර මත සිට තරගයේ විස්තර විචාරයේ යෙදෙති. මේ සම්බන්ධයෙන් ගාලූ දිසාව භාර නියෝජ්‍ය පොලිස්පති නුවන් වෙදසිංහ මහතාගෙන් කළ විමසීමකදී කියා සිටියේ ශී‍්‍ර ලංකා කි‍්‍රකට් ආයතනයෙන් අනුමැතිය ලැබුණු හෙයින් ඔවුන්ට ගාලූ කොටු පවුර මත සිට විස්තර විචාරයේ යෙදීමට අවසර දී ඇති බවයි.

( අද  උදෑසන තරඟය ආරම්භ වූ පසු )

 (පසුගිය 12 වැනිදා රොබට් ලුවිස් මහතා ගාලු කොටුපවුර මතදී )

ඡායාරූප සහ අතිරේක තොරතුරු - ප‍්‍රංශ පුවත් සේවය