(විනීතා එම් ගමගේ)

පුද්ගලික ආයතනයක් විසින් කොත්තමල්ලි මෙරටට ආනයනය කරන මුවාවෙන් ගෙන්වා තිබෙන කෘෂි අපද්‍රව්‍ය සහිත බහළුම් 28 සම්බන්ධව බාසල් සම්මුති කාර්යාලයට පැමිණිලි කරන්නැයි පරිසර අමාත්‍ය මහින්ද අමරවීර මහතා පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතාට අද දින (25) පෙරවරුවේ උපදෙස් දුන්නේය.

 බාසල් සම්මුතිය යනු අපද්‍රව්‍ය එක් රටකින් වෙනත් රටකට අපනයනය කිරීම පිළිබඳව ඇති ජාත්‍යන්තර ගිවිසුමකි.

එමෙන්ම මෙම බහාළුම් මෙරටට ගෙන්වා තිබෙන්නේ කොත්තමල්ලි ආනයනය කරන මුවාවෙන් බවත්, ඒ සම්බන්ධව යුක්රේන සමාගම විසින් මෙරට සමාගම කිසියම් රැවටීමක් කර තිබේ ද යන්න පිළිබඳව මේ වනවිට අදාල අංශ විසින් අවධානය කර ඇතත් බාසල් සම්මුති කාර්යාලයට පැමිණිලි කිරීම කෙරෙහිද දැඩිව අවධානය  යොමු කළ යුතු බවට ලේකම්වරයාට උපදෙස් දුන් බව අමාත්‍ය මහින්ද අමරවීර මහතා ලංකාදීපයට පැවැසීය.

මෙරට පුද්ගලික ආයතනය විසින් මෙම කෘෂි අපද්‍රව්‍ය සහිත බහාළුම් මෙරටට හිතාමතාම ගෙන්වන ලද්දේද, නැතහොත් ඔවුන් රැවටීමකට හසුව ඇත්ද යන්න සොයා බැලිය යුතු මෙන්ම විසඳා ගත යුතු කාරණයකැයිපෙන්වා දුන් අමාත්‍යවරයා මෙරට පුද්ගලික ආයතනය රවටා ඇතැයි ඔවුන් කරන ප්‍රකාශය මෙරට බලධාරින් රැවටීමට යොදන ලද උපක්‍රමයක්ද යන්නත් ගැනත් විධිමත් සොයා බැලිමක් කළ  යුතු බව කීය.

මේ සම්බන්ධව අවශ්‍ය පියවර ගන්නැයි මධයම පරිසර අධිකාරියට උ‍පදෙස් දුන් බව ද අමාත්‍යයවරයා කීය.

කෙසේ වුවද කෘෂි අපද්‍රව්‍ය මගින් විවිධ හානිකර තත්ත්වයන් මෙරට පරිසර පද්ධතියට ඇතුලුවිය හැකි  බැවින් ඒවා වහාම යුක්රේනයට ප්‍රතිඅපනයනය කරන්නැයි ද නිලදාරින්ට උපදෙස් දුන් බව අමාත්‍යවරයා තවදුරටත් කියා සිටියේය.