(බිමල් ශ්‍යාමන් ජයසිංහ)

ගොනාකෝවිලේ රොහා නම්වූ කුඩු ජාවාරම්කරුවාගේ මරණය සම්බන්ධයෙන් ප්‍රීතිය පළකිරීම සඳහා  ගල්කිස්ස කනත්තේ  සාදයක් පැවැත්වීමට සූදානම් වූ  සිව්  දෙනෙකු (අද  25  වැනිදා) අත්අඩංගුවට ගත් බව දෙහිවල පොලීසිය කියයි. මෙසේ අත්අඩංගුවට ගෙන ඇත්තේ ගොනාකෝවිලේ රොහාගේ ප්‍රතිවිරුද්ධ කල්ලි නායකයකු වන, රත්මලාන කුඩු අන්ජුගේ  නැඟණිය ඇතුළු සිව් දෙනෙකි.

මෙම සාදය සඳහා ඩුබායි සිට ලක්ෂ 20 ක මුදලක් එවා ඇති බව පොලිස් ආරංචි මාර්ග සඳහන් කරයි.

අත්අඩංගුවට පත් සැකකරුවන් සමඟ සංගීත භාණ්ඩ කිහිපයක්ද පොලිස් භාරයට ගෙන තිබිණි.

2016 වසරේ ජූනි මාසයේ මහර අධිකරණය අසලදී   ගොනාකෝවිලේ රොහා නමැත්තා විසින් කුඩු අංජු ගේ සහෝදරයා වූ සුරේෂ්  අසංක  සිල්වා හෙවත් ලංසියා නමැත්තා වෙඩි තබා ඝාතනය කළ බව කියැවේ. ගල්කිස්ස කනත්තේ පිහිටි ඔහුගේ සොහොන අසල මෙම සාදය පැවැත්වීම සඳහා සූදානම් වෙමින් සිටියදී  පොලිසිය මගින් මෙම පිරිස අත්අඩංගුවට ගෙන තිබිණි.

සංවිධානාත්මක අපරාධ කල්ලි නායකයෙකු වශයෙන් හඳුන්වන දේමුණි හැරල්ඩ් රෝහණ ද සිල්වා නොහොත් “ගොනා කෝවිලේ රොහා“ ඊයේ (24 වැනිදා) පෙරවරුවේදී පොලිස් වෙඩි පහරින් මියගියේය. ඉන්දියාවට පලා යාම සඳහා මීගමුව කොච්චිකඩේ කම්මල්තොට ප්‍රදේශයේ වාඩියක සැඟවී සිටියදී   පොලීසිය සමග ඇතිවූ වෙඩි වූ මාරු ක දී ගොනාකෝවිලේ රොහා නමැත්තා  මරණයට පත්විය.