(ඉන්දිකා රාමනායක)

කච්චතිව් දූපතේ ශාන්ත අන්තෝනි මුනිදුන්ගේ  දේවස්ථානයේ පැවති වාර්ෂික මංගල්‍යයට පැමිණ සිටි ශ්‍රී ලාංකිකයන්ට  අයත් කුඩා ඩිංගි යාත්‍රා 7 ක් ඉන්දියානු මුහුදු සීමාවට   ගසාගෙන ගොස් තිබිය ඉන්දීය වෙරළාරක්ෂක බලකායේ  නෞකාවක් විසින් ශ්‍රී ලංකා  නාවික හමුදාවට බාර දී තිබේ.
 
මෙම යාත්‍රා කච්චතිවු  මුහුදු සීමාවේදී නැංගුරම්ලා තිබියදී  ඊයේ (7) පස්වරුවේ  මෙලෙස ගසාගෙන ගොස් ඇති බව නාවික හමුදාව පවසයි.
 
 මෙලෙස ගසාගෙන ගොස් ඇත්තේ මන්නාරමෙන් සහ  මීගමුවෙන් පැමිණි යාත්‍රා  බවද නාවික හමුදාව කීවේය.
 
මංගල්‍යය අවසාන වීමෙන් පසු පිටම යාමට පැමිණි මෙම පිරිස තමන්ගේ නැංගුරම්ලා තිබූ බෝට්ටු අතුරුදන්ව ඇති බවට දැක සිද්ධිය නාවික හමුදාවට දැනුම් දී තිබිණි . පසුව නාවික හමුදාව  ප්‍රදේශයේ සෝදිසි කළ ද  බෝට්ටු හමු නොවීම නිසා සිද්ධිය ඉන්දීය වෙරළාරක්ෂක බලකාය ට දැනුම් දී ඇත .
 
බෝට්ටු  කච්චතීව් දුපතේ සිට මුහුදු සැතපුමක් ආසන්නව පිහිටි දෙරටේ මුහුදු   සීමාසීමාවට ගසා  ගෙන ගොස් තිබියදී ඉන්දීය වෙරළාරක්ෂක බලකාය බාරයට ගෙන තිබූ බව නාවික හමුදාව මාධ්‍ය ප්‍රකාශක ලුතිනන් කමාන්ඩර් ඉසුරු සුරියබණ්ඩාර මහතා පැවසීය.
 
 නාවික හමුදාව සිදු කළ දැනු දීම අනුව ඉන්දීය වෙරළාරක්ෂක බලකාය විසින් එම බෝට්ටු නාවික හමුදාව වෙත   බාරදුන් බව සුරියබණ්ඩාර මහතා කීය. 
 
නාවික හමුදාව විසින් බෝට්ටු නැවත රැගෙන ඒමෙන්  පසු ඒවායේ පැමිණ සිටි  බැතිමතුන්  පස්වරුවේ සිය ගම් ප්‍රදේශ වෙත ගිය බව නාවික හමුදාව කියයි.
 
 මෙම බෝට්ටුව ක්‍රමවත්ව නැංගුරම්ලා නොතිබීම හේතුවෙන් මෙලෙස ගසාගෙන ගොස් තිබූ බව නාවික හමුදාව  පවසයි .