(මහේෂ් කිර්තීරත්න) 

 
පාසල් සිසුවෙකු අපයෝජනයට ලක් කළැයි සැකපිට රිමාන්ඩ් බන්ධනාගාර ගතව සිටින උකුවෙල ප්‍රාදේශීය සභාවේ ශ්‍රී ලංකා පොදුජන පෙරමුණේ මන්ත්‍රී අනුරුද්ධ ඒකනායක මහතා එම පක්ෂයෙන් ඉවත් කිරීමට අදාළ ලියකියවිලි පක්ෂ මුලස්ථානය වෙත බාර දී තිබූ බව ශ්‍රී ලංකා පොදුජන පෙරමුණේ රත්තොට ආසනයේ කැඳවුම්කරු උකුවෙල ප්‍රාදේශීය සභාවේ විපක්ෂ නායක සමන්ත ධර්මසේන මහතා අද (22) පැවසීය.

සමන්ත ධර්මසේන මහතා ප්‍රකාශ කළේ අදාළ මන්ත්‍රීවරයා විසින් මීට පෙර අවස්ථාවකදී මාධ්‍යයට ප්‍රකාශයක් ලබා දෙමින් පක්ෂයෙන් ඉවත් වන බව ප්‍රකාශ කර තිබූ බවයි.  

පක්ෂයක් ලෙස ගත යුතු තීරණ රැගෙන ඇති අවස්ථාවක මෙම සිදුවීම වූ බවත්, ඒ නිසා ඔහු ශ්‍රී ලංකා පොදුජන පෙරමුණ නියෝජනය කරන අයෙකු නොවන බවත් ධර්මසේන මහතා පැවසීය. 


පක්ෂයක් ලෙස මෙවැනි පුද්ගලයින් සාමාජිකත්වයේ තබා නොගන්නා බවද කැඳවුම්කරු සමන්ත ධර්මසේන මහතා වැඩිදුරටත් පැවසීය.