ශ්‍රී ලංකාවේ ආර්ථික මධ්‍යස්ථාන සියල්ල එක භාරයක් යටතට ගන්නා බවත්, එමගින් අතරමැදියන්ගෙන් තොරව ගොවියාටත්, පාරිභෝගිකයාටත් සාධාරණයක් ඉටුකිරීමට අපේක්ෂා කරන බවත් කෘෂිකර්ම අමාත්‍ය මහින්දානන්ද අලුත්ගමගේ මහතා අද(11) කෘෂිකාර්මික අමාත්‍යංශයේදී පැවැසීය.

ගොවියාගේ අස්වැන්නට සාධාරණ මිලක් ලබා දීමත්, පාරිභෝගිකයාට සාධාරණ මිලක් යටතේ එළවළු මිලදී ගැනීමටත් අවස්ථාව ලබා දීම සඳහා ආර්ථික මධ්‍යස්ථානවල කටයුතු ක්‍රමවත්ව සිදුකිරීම පිළිබඳව පැවති සාකච්ඡාවකදී ඒ මහතා මේ බව සඳහන් කළේය. එහිදී වැඩිදුරටත් අදහස් දැක්වූ අලුත්ගමගේ මහතා මෙසේ ද කීය.

 “ රජයක් හැටියට අපිට තියෙන යුතුකමක් තමයි ජනතාවට සාධාරණ මිලට භාණ්ඩ ලබා දීම. එක දවසක් බඩු මිල වැඩි වුණොත් බනින්නේ ආණ්ඩුවට. ඒ නිසා ආණ්ඩුව හැටියට අපි බැදිලා ඉන්නවා සාධාරණ මිලට බඩු ටික බෙදා දෙන්න. කෘෂිකර්ම අමාත්‍යාංශය විදිහට අපිට තියෙන්නෙ වවන්න. අපි ජනතාවට අවශ්‍ය සියලු ආහාර නිෂ්පාදනය කරන්න, ආනයනය සීමා කරන්න කටයුතු කරනවා. බඩු මිල වැඩි නිසා රජය තීරණයක් ගත්තා, බඩු මිල අඩු කරන්න. ඒ අනුව අල,ලූනූ,පරිප්පු වගේ අත්‍යවශ්‍ය භාණ්ඩ 27ක් මාස 03ක කාලයක් පාලන මිලට ලබා දෙන්න රජය තීරණය කළා. වෙළඳ අමාත්‍යාංශය සතොස සහ සමූපකාර ආයතන එක්ක එකතුවෙලයි මේක කරන්නේ. ඒවා රජයේ ආයතන.
 
ආර්ථික මධ්‍යස්ථානත් අයිති රජයට. ඒවා හදන්න මිනිස්සුන්ගේ සල්ලි බිලියන ගණන් වියදම් කරලා තියෙනවා. ආර්ථික මධ්‍යස්ථාන කියන්නේ කඩ දීලා, කඩ කුලී එකතු කරන තැනක් විතරක් නෙවෙයි. මේක රාජ්‍ය යාන්ත්‍රණයේ කොටසක්. ආර්ථික මධ්‍යස්ථාන හදපු අරමුණේ දැන් අපි නැහැ. පාරිභෝගිකයාට සාධාරණ මිලක් යටතේ එළවළු ලබා දෙන්න ක්‍රමවේදයක් හදන්න කියලා ජනාධිපතිතුමා අපිට කිව්වා. ආර්ථික මධ්‍යස්ථාන දෙන්න ඕනේ ගොවියට. එතකොට ගොවියට පුළුවන් සාධාරණ මිලකට එළවළු ලබා දෙන්න. නමුත් දැන් මේක ව්‍යාපාරිකයන් කිහිපදෙනෙක් පමණක් මෙහෙයවන තැනක් වෙලා. එළවළු ටික තැන් 4කට විතර ගිහින් තමයි පාරිභෝගිකයාට ලැබෙන්නේ. අතරමැදියෝ වැඩියි. යාන්ත්‍රණය හරියට හැදුණු නැති ගැටළුවයි මේ තියෙන්නේ.
 
ආර්ථික මධ්‍යස්ථානයේ කළමනාකරුවන්ගේ වගකීම කඩ කුලිය එකතු කරන එක විතරක් නෙවෙයි. අපි බලාපොරොත්තු වෙනවා ලංකාවේ ආර්ථික මධ්‍යස්ථාන සියල්ල එක භාරයක් යටතට ගන්න. සතොස වගේ ආයතනයක් හදන්න. අතරමැදියන්ගෙන් තොර ක්‍රමවේදයක් හදලා ගොවියාටත්,පාරිභෝගිකයාටත් සාධාරණයක් කිරීම අපේ අපේක්ෂාවයි. ගොවියා ගමේ අඬනවා බඩු ටික විකුණගන්න බෑ කියලා. පාරිභෝගිකයා කියනවා බඩු ගණන් කියලා. අතරමැදියා ලාභ ලබනවා. අතරමැදියාට යන ලාභය නැති කරලා ගොවියා සහ පාරිභෝගිකයා යන දෙපාර්ශවයටම සාධාරණයක් කිරීමටයි අපට අවශ්‍ය. ගොවි සංවිධානවලට ආර්ථික මධ්‍යස්ථානවල කඩ ලබාදෙනවා. එතකොට මැනිං වෙළඳපොළෙන් එළවළුගන්න බෑ. සිවිල් ආරක්ෂක දෙපාර්තමේන්තුව මඟින් ආර්ථික මධ්‍යස්ථානවලට ගේන ලොරි පරීක්ෂා කරනවා. පිටින් බඩු ගේන්න බෑ. පිටින් බඩු ගෙනාවොත් මේ ක්‍රමවේදය ක්‍රියාත්මක කරන්න බැහැ. ගොවි සංවිධානවලට කලින් ඇණවුමම දුන්නම ඔවුන් ආර්ථික මධ්‍යස්ථානවලට බඩු ගෙනත් දෙනවා. ඔවුන්ගේ බඩුවලට මුදල් ගෙවීම කළමනාකරු සතු වගකීමක්. බඩු ටික විකුණන වගකීමත් කලමනාකරු සතුයි. ආර්ථික මධ්‍යස්ථානයේ කළමනාකාරීත්වයටත් සිවිල් ආරක්ෂක දෙපාර්තමේන්තුවේ ප්‍රධාන නිලධාරියෙක් පත් කරනවා. ගොවි සංවිධානවලට එකතු කිරීමේ මධ්‍යස්ථාන ලබා දෙන්නට අපි කටයුතු කරනවා. එතකොට ගොවීන්ට තමන්ගේ එළවළු පිරිසිදුව ආර්ථික මධ්‍යස්ථානවලට ලබා දෙන්න පුළුවන්. තව මාස 03ක් ඇතුළත ආර්ථික මධ්‍යස්ථානවල අලුත් වැඩපිළිවෙලක් ක්‍රියාත්මක කරනවා” යැයිද පැවසීය.

මෙම අවස්ථාවට රාජ්‍ය අමාත්‍ය ශෂීන්ද්‍ර රාජපක්ෂ මහතා, ආර්ථික මධ්‍යස්ථාන කළමනාකරුවෝ, ආර්ථික මධ්‍යස්ථානවල වෙළඳ සංගම් නියෝජිතවරු, අමාත්‍යාංශ නිලධාරීහු එක්ව සිටියහ.