සිරියා රජයට සහාය පළ කරමින් එරට කැරැුලිකරුවන්ට එරෙහිව සටන් වදින ලෙබනනයේ හිස්බුල්ලා සටන්කාමීන්ට සිරියාවෙන් පිටවන්නැයි ඇමෙරිකා රජය ඊයේ (29)අනතුරු ඇඟවීමක් කළේය.  
ලෙබනනයේ හිස්බුල්ලා සටන්කාමීන් සිරියානු අර්බුදයට මැදිහත් වීමෙන් සිදුවන්නේ එම අර්බුදය තව තවත් අවුල් වීමක් බවත් ඊට සාමකාමී විසඳුමක් සෙවීමට නොහැකි වනු ඇති බවත් ඇමෙරිකා රාජ්‍ය දෙපාර්තමේන්තුව පවසයි.
රාජ්‍ය දෙපාර්තමේන්තු ප‍්‍රකාශක ජෙන් සාකී මාධ්‍ය හමුවක් කැඳවමින් කියා සිටියේ හිස්බුල්ලා සටන්කාමීන් සටන් අත්හැර වහාම සිරියාවෙන් පිටවී යා යුතු බවය.

සිරියාවේ අසල්වැසියකු වන ලෙබනනයේ කි‍්‍රයාත්මක හිස්බුල්ලා සංවිධානය සටන්කාමී සංවිධානයක් පමණක් නොව, දේශපාලනික සංවිධානයක් ද වෙයි. ඇමෙරිකාව ප‍්‍රමුඛ බටහිර රටවල් එම සංවිධානය ‘ත‍්‍රස්තවාදීන්’ ලෙස සළකයි.
සිරියාවේ සිවිල් යුද්ධය තමාගේ යුද්ධයක් බවත් එය අවසන් වනතුරු සිරියානු ජනපති බෂීර් අල් අසාද්ගේ රජයට සහාය දෙන බවත් හිස්බුල්ලා නායක හසන් නසරල්ලා පවසා ඇත.


මේ වනවිට සිරියානු රජයේ හමුදාවට කැරැලිකරුවන් මර්දනය කිරීමට හැකිවී ඇත්තේ ද හිස්බුල්ලා සටන්කාමීන්ගෙන් ලැබෙන සහාය නිසාය.
සිරියාව සුන්නි මුස්ලිම්වරුන් අතට පත්වීම ලෙබනනයට තර්ජනයක් බව නසරල්ලා පවසා ඇත.
එපමණක් නොව, ඇමෙරිකාවේ සහ ඊශ‍්‍රායලයේ සහාය ලැබෙන සිරියානු කැරැුලිකරුවන්ට තමන් කිසිදු සමාවක් නොදක්වන බවද ඔහු අවධාරණය කර ඇත. ඊශ‍්‍රායලය ද හිස්බුල්ලා සංවිධානයේ සතුරෙකි.