සීබ‍්‍රාවන්ගේ සිරුරේ පිහිටන ඉරි රටා දෘෂ්‍ය මායාවක් සේ කි‍්‍රයාකිරීමේ සමත් බව නවතම පර්යේෂණයකින් හෙළිව ඇත.

බි‍්‍රතාන්‍යයේ ලන්ඩන් හා ක්වීන්ස්ලන්ඞ් විශ්වවිද්‍යාලයන්ගේ පර්යේෂකයන් පිරිසක් මෙම පර්යේෂණය සිදුකර ඇති අතර ඔවුන් පවසන්නේ මෙම ඉරි රටා වලින් මවන දෘෂ්‍ය මායාවන්ට රැවටීම නිසා සිංහයන් දිවියන් වැනි දඩයම්කරුවන් අන්දමන්ද වන බවයි.

විශේෂයෙන් සීබ‍්‍රාවන් රංචු වශයෙන් සිටින විට මෙම තත්ත්වය හොදින්ම හදුනාගත හැකි බව ඔවුන් පවසයි.

සීබ‍්‍රාවන්ගේ දෙපස හා පසුපස ඉරි පිහිටා ඇති රටාවන්ට අනුව ඒවා ඉහළට චලනය වන්නාක් මෙන් පෙනේ.නමුත් සැබැවින්ම එසේ චලනයක් සිදුනොවන අතර එය දෘෂ්‍ය මායාවක් බව පර්යේෂකයන් කියයි.

මෙම මායාවට රැවටීම නිසා මාංශ භක්ෂක දඩයම්කරුවන්ට සිීබ‍්‍රාවෙකුට එක්වරම පහර එල්ල කිරීමට අපහසු බව පර්යේෂණයෙන් සොයාගෙන ඇත.

මෙම මායාවට හසුවන්නේ දඩයම්කරුවන්ම පමණක් නොවන බවත් සොයාගැනීමට හැකිවී තිබේ.මැස්සන් හා මදුරුවන් වැනි කෘමින් හටද එයින් ගැලවී ගත නොහැකි යැයි පර්යේෂකයන් කියයි.සීබ‍්‍රාවාගේ සම කොතෙකුත් ඉහළට ගමන් කරන්නාක් මෙන් පෙනෙන බැවින් මෙම කෘමින් සම මත නොවසා කැරකෙමින් සිටින බව පෙනී ගියේයැයි ඔවුන් පවසයි.