ලිබියාවේ බෙන්ගාසි නුවර ඇමෙරිකානු තානාපති කාර්යාලයට පහර දී තානාපති කි‍්‍රස් ස්ටීවන්ස් ඇතුළු සිව් දෙනකු ඝාතනය කළේ අල් කයිඩා සාමාජිකයන් යැයි ඇමෙරිකානු රාජ්‍ය ලේකම් හිලරි ක්ලින්ටන් පවසයි. රාජ්‍ය ලේකම්වරිය මේ බව කියා සිටියේ ඊයේ (27) එක්සත් ජාතීන්ගේ මහ ලේකම් බෑන් කී මූන් සමඟ උතුරු අපි‍්‍රකානු රටවල ව්‍යාප්ත සිටින අල් කයිඩා ඇතුළු සෙසු ඉස්ලාමීය සටන්කාමීන් ගැන සාකච්ඡා කළ අවස්ථාවේදීය. පුද්ගල ඝාතන, බෝම්බ පිපිරුවීම් පමණක් නොව පුද්ගලයන් පැහැරගෙන ගොස් කප්පම් ඉල්ලීම් ආදී අපරාධ රැසකට එම සටන්කාමීන් සම්බන්ධ යැයි ද ඇමෙරිකානු රාජ්‍ය ලේකම්වරිය අවධාරණය කළාය. එම ඉස්ලාමීය සටන්කාමීන්ගේ අරමුණ වී ඇත්තේ උතුරු අපි‍්‍රකානු රටවල් අස්ථාවර කිරීමට බවත් ලිබියාවේ බෙන්ගාසි නුවර තම තානාපති කාර්යාලයට එල්ල කළ ප‍්‍රහාරයෙන් ඒ බව සනාථ වන බවත්  ඇමෙරිකානු රාජ්‍ය ලේකම් හිලරි ක්ලින්ටන් වැඩි දුරටත් කියා සිටී. ලිබියාවේ බෙන්ගාසි නුවර ඇමෙරිකානු තානාපති කාර්යාලයට පහර දීම සිදුවුණේ ඉකුත් සැප්තැම්බර් 11 වැනිදාය. ඔසාමා බින් ලාඩන්ගේ නායකත්වයෙන් යුත් අල් කයිඩා සටන්කාමීන් 2001 වසරේදී ඇමෙරිකාවට එල්ල කළ ප‍්‍රහාරයේ 11 වැනි සැමරුම එදිනට යෙදී තිබුණි. බෙන්ගාසි නුවර ඇමෙරිකානු තානාපති කාර්යාලයට එම ප‍්‍රහාරය එල්ල වීමට හේතු වුණේ ඉස්ලාම් විරෝධී ඇමෙරිකානු චිත‍්‍රපටයයි. ලිබියාවේ ඇමෙරිකා තානාපති කාර්යාලයට පහර දුන්නේ තම සංවිධානය බවත් තමන් එසේ කළේ තම දෙවැනි නායකයා ඇමෙරිකා ප‍්‍රහාරයකින් ඝාතනය වීම නිසා බවත් උතුරු අපි‍්‍රකානු අර්ධද්වීපයේ කි‍්‍රයාත්මක අල් කයිඩා සංවිධානය ද පවසා ඇත. අල් කයිඩාව මැදපෙරදිග සහ අපි‍්‍රකානු කලාපයේ ජනතාවගෙන් ඉල්ලා සිටින්නේ එම රටවල පිහිටි ඇමෙරිකා තානාපති කාර්යාලවලට අඛණ්ඩව ප‍්‍රහාර එල්ල කරන ලෙසටය. ඒ අනුව එම රටවල පිහිටි තම තානාපති කාර්යාලවලට ඇමෙරිකා රජය විශේෂ ආරක්ෂාවක් සැපැයීය. මේ අතර ලිබියාවේ බෙන්ගාසි නුවර ඇමෙරිකානු තානාපති කාර්යාලයට එල්ල කළ ප‍්‍රහාරය පසුපස ලිබියා රජය සිටින බවට ඇමෙරිකා ආරක්ෂක අංශ නිලධාරීහු සැක පළ කරති. සිදුවුණේ කුමක්දැයි සොයා බැලීමට මේ වනවිට ඇමෙරිකානු එෆ්.බී.අයි. පරීක්ෂකයන් කණ්ඩායමක් ලිබියාවේ බෙන්ගාසි නුවරට පැමිණ සිටිති. ප‍්‍රහාරයෙන් දින තුනකට පසු ලිබියා රජය කියා සිටියේ ප‍්‍රහාරයට සම්බන්ධ 50 දෙනකු හඳුනා ගෙන  අත්අඩංගුවට ගත් බවය. ප‍්‍රහාරය සිදුවෙද්දී බෙන්ගාසි නුවර ඇමෙරිකා තානාපති කාර්යාලයට ලිබියා රජයේ ආරක්ෂක නිලධාරීන්ගේ ආරක්ෂාව ලැබී තිබුණි. කෙසේ නමුත් කලහකාරීන් එහි පැමිණෙද්දී එම ආරක්ෂක නිලධාරීන් ඔවුන්ට නියමිත ස්ථානවල නොසිටි බව ඇමෙරිකානු බුද්ධි අංශ අනාවරණය කර ගෙන ඇත.