පාකිස්තාන හිටපු අගමැතිනී බෙනාසීර් බූතෝ ඝාතනයට සම්බන්ධ යැයි චෝදනා ලැබ සිටින එරට හිටපු ජනපති පර්වේස් මුෂාරෆ් ඊයේ (6) රාවුල්පිණ්ඩි නුවර අධිකරණයක් හමුවේ පෙනී සිටීමට නියමිතව සිටි නමුත් ඔහුට අධිකරණයට පැමිණීමට නොහැකි විය.
 

මුෂාරෆ්

මුෂාරෆ් අධිකරණයට නොපැමිණියේ ආරක්ෂක හේතූ නිසා යැයි ඔහුගේ නීතීඥවරු සහ පොලිසිය පැවැසූහ.

මුෂාරෆ් ඝාතනය කරන බවට තලේබාන් සටන්කාමීන් අනතුරු අඟවා තිබීම ඊට හේතුවයි. විනිසුරු චෞද්‍රි රෙහ්මාන් අධිකරණ කටයුතු ලබන 20 වැනිදාට කල් තැබුණු අතර එදිනට මුෂාරෆ්ට අධිකරණය හමුවේ පෙනී සිටින්නැයි ද නියෝග කළේය.

බෙනාසීර් බූතෝ, 2007 වසරේ දී ඝාතනයට ලක් වූයේ ද රාවුල්පිණ්ඩි නුවරදීය. ඒ, ඇය එම වසරේ පැවැති මහ මැතිවරණයට ඉදිරිපත් වී, මැතිවරණ රැලියක් අමතමින් සිටිද්දීය. ඇය ඝාතනයට ලක් වෙද්දී ජනපති ධුරයේ සිටියේ මුෂාරෆ්ය.

බෙනාසීර් බූතෝට ඉස්ලාමීය සටන්කාමීන්ගෙන් මරණීය තර්ජන එල්ල වී තිබියදී ඇයට නිසි ආරක්ෂාවක් ලබා දීමට මුෂාරෆ් පියවර නොගත් බවට චෝදනා එල්ල වී ඇත.

හමුදාපතිව සිට මුෂාරෆ්, 1999 වසරේ සිදු කළ හමුදා කුමන්ත‍්‍රණයකින් බලයට පත් වූයේය. ඒ,  එවකට අගමැතිව සිටි නවාස් ෂාරීෆ්ගේ රජය පෙරළමිනි.
පසුගියදා පැවැති පාකිස්තාන මහ මැතිවරණයෙන් යළිත් ජන වරමක් හිමිකර ගැනීමට නවාස් ෂරීෆ් සමත් විය. එම මැතිවරණයට මුෂාරෆ් ද දේශපාලන පක්ෂයක් පිහිටුවා ගෙන ඉදිරිපත් වූයේය.

දීර්ඝ කාලයක් රටින් පිටවී සිට මුෂාරෆ් යළි පාකිස්තානයට පැමිණියේ එම මැතිවරණයට ඉදිරිපත් වීමටය. එහෙත් ඔහු ජනපති ධුරයේ සිටිද්දී ව්‍යවස්ථාවට පටහැනිව කටයුතු කළ බවට චෝදනා කරමින් අත්අඩංගුවට ගෙන නිවාස අඩස්සියට පත් කෙරුණි. එම නිසා ඔහුට මැතිවරණයට ඉදිරිපත් වීමට ද නොහැකි විය.