මාලදිවයිනේ ශ්‍රේෂ්ඨාධිකරණය, එරට ජනපතිවරණය පැවැත්වීමට බාධා වන අයුරින් තීන්දු ලබා දීම කිසිසේත් අනුමත කළ නොහැකි බවත් එසේ කිරීමෙන් වැළැකී සිටිය යුතු බවත් එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය නාවී පිල්ලේ කියා සිටී.

 මාලදිවයින් ශ්‍රේෂ්ඨාධිකරණයේ එම කි‍්‍රයා කලාපය රටේ ප‍්‍රජාතන්ත‍්‍රවාදයට බාධාවක් බව ද මහ කොමසාරිස්වරිය වැඩි දුරටත් පවසා ඇත.
මාලදිවයිනේ ජනපතිවරණය පැවැත් වූයේ ඉකුත් සැප්තැම්බර් 7 වැනිදාය. එහිදී, කිසිදු අපේක්ෂකයකුට සියයට 50 කට වැඩි ඡන්ද ප‍්‍රතිශතයක් හිමිකර ගැනීමට නොහැකි විය.

වත්මන් ජනාධිපති හසන්ට හිමිකර ගැනීමට හැකිවුණේ සියයට 5 ක ඡුන්ද ප‍්‍රතිශතයක් පමණි. සියයට 45 ක ඡුන්ද ප‍්‍රතිශතයක් හිමිකර ගත්තේ කුමන්ත‍්‍රණයකින් බලයෙන් නෙරපා දැමුණු ජනපති මොහොමඞ් නෂීඞ්ය.

ඒ අනුව සැප්තැම්බර් 28 වැනිදා ජනපතිවරණයේ දෙවැනි වටයක් පැවැත්වීමට නියමිතව තිබුණි. අක‍්‍රමිකතා සිදුවුණු බවට එල්ල වූ චෝදනා හේතුකොට ගනිමින් දෙවැනි වටය පැවැත් වීම අධිකරණ නියෝගයකින් කල් දැමුණි. පසුව එය අවලංගු කෙරුණි.

ඉන්පසු යළිත් වරක් ජනපතිවරණයක් පැවැත්වීමට සූදානම් වුවත් පොලිසියෙන් ඊට බාධා එල්ල විය. ඒ අනුව ජනපතිවරණය ද අවලංගු කෙරුණි.
යළිත් වරක් ජනපතිවරණයක් පැවැත්වීමට නියමිතව ඇත්තේ එලැඹෙන 9 වැනිදාය. එහිදී ද කිසිදු අපේක්ෂකයකුට සියයට 50 ත ඡුන්ද ප‍්‍රතිශතයක් දිනා ගැනීමට නොහැකි වුවහොත්, දෙවැනි වටයක් 16 වැනිදා පැවැත් වීමට කටයුතු සූදානම් කර ඇතැයි මාලදිවයින මැතිවරණ කොමිසම නිවේදනය කර ඇත.