පැය 3 කට අධික කාලයක් අඩි 11 ක් වැලි යට වැළලී සිටි දරුවකුගේ ජීවිතය බේරා ගැනීමට ඇමරිකාවේ ඉන්දියානා ප‍්‍රාන්ත ගිනි නිවීම් භටයෝ සමත් වූහ.

මෙම දරුවා සිය දෙමව්පියන් සමග ඉන්දියානා ප‍්‍රාන්තයේ ජාතික උද්‍යානයක සංචාරය කරමින් සිට ඇත. මෙම උද්‍යානයේ පිහිටි වැලි කදු නිසාවෙන් ඒවා මත අඩිය තැබීමේදී පරෙස්සම් විය යුතු යැයි සංචාරකයන්ට නිරන්තරයෙන් අවවාද කෙරේ.එම අවවාද නොසළකා හැර ඇති දෙමව්පියන් සංචාරකයන්ට තහනම් කලාපයක ඇවිදිමින් සිටියදී හදිසියේම දරුවා වළකට වැටී ඇති අතර ඔහු ගොඩ ගැනීමට මාපියන් දැරූ උත්සාහයේදී වැලි කණ්ඩි කඩා වැටී දරුවා පණපිටින් වැළලී ගොස් තිබේ.

දෙමව්පියන්ගේ දැනුම් දීමකින් වහා එතැනට පැමිණි ගිනි නිවීම් භටයන් දරුවා ගොඩ ගැනීමට පැය 3 කට අධික කාලයක් වෙහෙස වී ඇත.මුලින්ම අධි සංවේදක උපකරණ ආධාරයෙන් දරුවා කොපමණ ගැඹුරින් වැළලී ඇත්දැයි සොයාගෙන ඇති ඔවුන් පස් කපන යන්ත‍්‍රයක් භාවිතයෙන් වැලි ඉවත් කර දරුවා ගොඩට ගෙන රෝහලක් කරා යොමුකර තිබේ.

ගොඩට ගැනීමේදී සිහිසුන්ව සිටියද පසුව ගිලන් රියේදී සිහි ලැබූ දරුවා හඩන්නට පටන් ගත් බවත් සැමගේ සිත් සැහැල්ලූ වූයේ එවිට බවත් ගිනි නිවීම් භටයන්ගේ ප‍්‍රධානී රැල්ෆ් මාර්ටින් කියයි.දරුවාගේ දිවි රැකී තිබීමට වඩාත්ම හේතු වී ඇත්තේ වැලි ගොඩෙහි දරුවා සිරවී සිටි ස්ථානයේ ‘‘වායු සංචිතයක්ද‘‘ සිරවී තිබීම බව ඔහු පවසයි.