තුර්කියේ ඉස්තාම්බුල් නුවර උද්‍යානයක සාප්පු සංකීර්ණයක් ඉදිකිරීමට එරට රජය තීරණය කිරීමත් සමඟ, ඊට විරෝධය පළ කරමින් ඊයේ (3) ද දැවැන්ත විරෝධතා රැලි කිහිපයක් පැවැත් වුණු අතර විරෝධතාකරුවන් සහ පොලිසිය අතර හටගත් ගැටුම්වලින් 500 කට වැඩි පිරිසක් තුවාල ලැබූහ.

අත්අඩංගුවට ගැනුණු විරෝධතාකාරියක්

මේ වනවිට 1,700 කට වැඩි පිරිසක් පොලිස් අත්අඩංගුවට පත්ව ඇත. විරෝධතාකරුවන් පලවා හැරීමට කඳුළු ගෑස් සහ බැටන් ප‍්‍රහාරද එල්ල කිරීමට පොලිසියට සිදුවිය.
එම අවස්ථාවේදී විරෝධතාකරුවන් රජයේ ගොඩනැගිලිවලට පහර දී අලාභහානි සිදු කළ බව ද වාර්තා වේ. විරෝධතාකරුවන් එක හඬින් කියා සිටියේ අගමැති එඞ්රෙගොන් ධුරයෙන් ඉවත් විය යුතු බවය.
ඊයේ දිනයේදී ද විරෝධතාකරුවන් අගමැති කාර්යාලය ඉදිරියට ගොස් ඊට ප‍්‍රහාරයක් එල්ල කිරීමට ද උත්සහ කළ නමුත් පොලිසිය මැදිහත්වීමෙන් එය වැළැකිණි.
මේ අතර කලක් තුර්කියේ මිතුරකුව සිටි සිරියා ජනාධිපති බෂීර් අල් අසාද් චෝදනා කරන්නේ තුර්කි අගමැති තම ජනතාව පීඩාවට පත් කරන බවටය.
තුර්කි අගමැතිවරයා පවසා ඇත්තේ කොතරම් බාධා ආවත් ඉස්තාම්බුල් නගරයේ නවීකරණ කටයුතු නවත්වන්නේ නැති බවය.

විරෝධතාකරුවන්ට කඳුළු ගෑස්