නියමුවන් රහිත ඩ්‍රෝන යානා යොදා ගෙන ඇමෙරිකන් හමුදාව සිදු කළ මිසයිල ප‍්‍රහාරයකින්, පාකිස්තාන සිවිල් වැසියන් නව දෙනකු ජීවිතක්ෂයට පත් වීමත් සමඟ පාකිස්තාන නව අගමැති නවාස් ෂරීෆ්, ඊයේ (9) ඉස්ලාමාබාද් අගනුවර සිටින ඇමෙරිකා තානාපති කැඳවා එම ප‍්‍රහාරය සම්බන්ධයෙන් සිය විරෝධය පළ කළේය.


ඇමෙරිකා හමුදාව එම ඩ්‍රෝන ප‍්‍රහාරය එල්ල කළේ පෙරේදා (8) ය.    ඒ, ඇෆ්ගන් පාකිස්තාන දේශසීමාව අසල පාකිස්තානයට අයත් උතුරු වසිරිස්තානයේ තලේබාන් තිප්පොලක් ඉලක්ක කර ගනිමිනි. ප‍්‍රහාරයෙන් සිවිල් වැසියන්ට අමතරව, සටන්කාමීන් මියගියේදැයි යන්න මෙතෙක් වාර්තා වී නැත.
පාකිස්තාන නව අගමැති ලෙස ෂරීෆ්, පසුගිය දා තෙවැනි වරට දිවුරුම් දුන් අවස්ථාවේදී ඇමෙරිකාවට කියා සිටියේ ඇෆ්ගනිස්තානයේ සිටින ඇමෙරිකා හමුදාව, අනවසරයෙන් පාකිස්තාන ගුවන් සීමාව උල්ලංගනය කරමින් එල්ල කරන ඩ්‍රෝන ප‍්‍රහාර වහා නැවැත්විය යුතු බවය.
ඇමෙරිකාව සිදුකරන එම ප‍්‍රහාර, පාකිස්තානයේ ස්වෛරීත්වය උල්ලංඝනය කිරීමක් බව ද නව අගමැති ෂරීෆ් වැඩි දුරටත් කියා සිටී.
ඇමෙරිකා හමුදාව පාකිස්තානයේ සිදුකරන එම ඩ්‍රෝන ප‍්‍රහාර සම්බන්ධයෙන්, ඇමෙරිකාවට ගොස් ඇමෙරිකන් ජනපති හමුවී සාකච්ඡුා කිරීමට තමා සූදානමින් සිටින බව ද අගමැති ෂරීෆ් පවසා තිබේ.