ගුවන්යානා වලට ‘කැපකර‘‘ ඇති දේවාලයක් ගැන වාර්තා වන්නේ ඉන්දියාවේ පන්ජාබ් ප‍්‍රාන්තයෙනි.

දේවාලය නැමැදීමට එන්නන් පුද පඬුරු ලෙස රැගෙන එන්නේ කුඩා ප‍්‍රමාණයේ සෙල්ලම් ගුවන්යානාය.අවට වෙළදසැල්වලින් මේ ‘‘පඬුරු‘‘ ලබාගැනීමේ හැකියාව ඇත.පඬුරු රැගෙන දේවාලයට ඇතුල්වන පුද්ගලයින් අනතුරුව යොමු කෙරෙනුයේ පහත මහලටය.එහි ඇත්තේ වීදුරු කුටිවල බහා ඇති තරමක් විශාල පරිමානයේ ගුවන්යානා ආකෘතීය.පඬුරු ඔප්පු කෙරෙන්නේ මේවාටය.

දෙවොලට පැමිණෙන්නන්ගේ විශ්වාසය වනුයේ මෙසේ පඬුරු ඔප්පු කිරීමෙන් තමන්ට කවදා හෝ විදෙස් රටක සංචාරය කිරීමට අවස්ථාව ලැබෙනු ඇත යන්නයි.ඔවුන්ගෙන් බහුතරය ඉගෙනුම ලබන තරුණ තරුණියන්ය.ඉක්මනින්ම වෙනත් රටකට යෑමේ දැඩි වුවමනාවක් ඇත්තේ ඔවුනට බව පුද පඬුරු විකුණන කඩ හිමියන් පවසයි.

මේ අපූරු දේවාලය ඇතිවූයේ කෙසේදැයි කිසිවෙකුත් නොදනී.විශ්වාස කෙරෙන්නේ අතීතයේ විදෙස් රටකට යෑමට දෙවියන්ගෙන් වරම් ඉල්ලූ පුද්ගලයෙකුගේ ඉල්ලීම සඵල වී ඊට දෙවියන්ට ගරු බුහුමන් දැක්වීමට ඔහු මෙම දේවාලය ඇති කරන්නට ඇති බවයි.