සුබ සාධන සේවා සහ රැකියා කප්පාදු කිරීමට ඉතාලි අගමැති එන්රිකෝ ලෙටාගේ රජය ගත් තීරණයට විරෝධය පළ කරමින්, ඊයේ (20) රෝම අගනුවර දැවැන්ත විරෝධතා රැලියක් පැවැත්වුණු අතර පොලිසිය ඊට හරස් වූ අවස්ථාවේදී, විරෝධතා කරුවෝ පොලිසිය සමඟ දරුණු ගැටුම් ඇති කර ගත්හ.

විරෝධතාව පැවැත් වූයේ, ඉතාලි මුදල් අමත්‍යාංශය ඉදිරිපිටය. විරෝධතා රැලියට දහසකට ආසන්න පිරිසක් එක් වී සිටියහ. ඔවුහු රජයට බල කරන්න වූයේ, සුබසාධන සේවා සහ රැකියා කප්පාදු කිරීම් වහා නවත්වන ලෙසටය.

වෙස් මුහුණු පැළැඳි විරෝධතා කරුවන් පිරිසක්, අමත්‍යාංශ ගොඩනැගිල්ලට පහර දීමටත් මෝටර් රථවලට පහර දී ගිනි තැබීමටත් පටන් ගත් අවස්ථාවේදී පොලිසිය කි‍්‍රයාක්මක විය.

පොලිස් නිලධාරීහු විරෝධතා කරුවන්ට කඳුළු ගෑස් සහ බැටන් ප‍්‍රහාර එල්ල කළහ. විරෝධතාකරුවෝ ගල්වලින් සහ කුණු බිත්තරවලින් පොලිස් නිලධාරීන්ට පහර දෙන්න වූහ.

පොලිසිය කියා සිටියේ විරෝධතාකරුවන් 50 කට වැඩි පිරිසක් අත්අඩංගුවට ගැනීමට කටයුතු කළ බවය.

දැඩි මූල්‍ය අර්බුදයකට මුහුණ පා සිටින ඉතාලි අගමැති එන්රිකෝ ලෙටාගේ රජය, පසුගිය දා තවත් අර්බුදයකට මුහුණ දුන්නේය. ඒ, ඉතාලියේ හිටපු අගමැති සිල්වියෝ බර්ලූස්කෝනී එරට සන්ධාන රජයෙන්, ඔහුගේ පක්ෂයේ ඇමැතිවරුන් ඉවත් කර ගැනීමට සූදානම් වීම නිසාය.

එම අර්බුදය සම්බන්ධයෙන්, අගමැති එන්රිකෝ ලෙටා කෙරෙහි පාර්ලිමේන්තුවේ විශ්වාසය පළ කිරීම සඳහා පැවැත්වුණු ඡන්ද විමසුමෙන් අගමැති ලෙටා ජයග‍්‍රහණය කළේය. ඒ අනුව, හටගත්  අර්බුදය තාවකාලිකව සන්සුන් වූයේ යැයි එරට මාධ්‍ය වාර්තා පෙන්වා දුන්නේය.

මේ වනවිට, දුෂණ වංචා චෝදනා එල්ල වී සිටින හිටපු අගමැති සිල්වියෝ බර්ලූස්කොනීගේ ප‍්‍රජා අයිතිය වසර දෙදකට තහනම් කිරීමට ද රෝම අගනුවර අභියාචනා අධිකරණයක් තීන්දු කර ඇත.

 

විරෝධතාකරුවෝ පොලිසිය සමඟ ගැටෙමින්