ඉන්දියාවේ කර්ණාටක ප‍්‍රාන්ත මැතිවරණයෙන් භාරතීය ජනතා පක්ෂය අභිබවා විශිෂ්ට ජයක් හිමි කරගැනීමට පාලක කොංග‍්‍රස් පක්ෂය ඊයේ (8) සමත් විය.

කොංග‍්‍රස් පක්ෂය, හිමිකරගත් එම ජයග‍්‍රහණයත් සමඟ පස් වසරක් කර්ණාටක ප‍්‍රාන්තයේ බලය හෙබ වූ භාරතීය ජනතා පක්ෂයට දකුණු ඉන්දියාවේ තමන් සතුව පැවැති එකම ප‍්‍රාන්තයේ බලය අහිමි විය. 

දුෂණ චෝදනා ලැබ ජනතා අප‍්‍රසාදයට පත් වී සිටින කොංග‍්‍රස් පක්ෂය කර්ණාටක ප‍්‍රාන්තයේ බලය තහවුරු කර ගැනීමට සමත් වීම ඔවුන් ලැබූ සුවිශේෂී ජයග‍්‍රහණයක් බව දේශපාලන විචාරකයෝ පෙන්වා දෙති.

කර්ණාටක ප‍්‍රාන්තයේ ආසන 224 න් අඩකටත් වඩා එනම් ආසන 121 ක් දිනා ගැනීමට ඉන්දීය කොංග‍්‍රසය සමත්විය. මෙතෙක් ප‍්‍රාන්තයේ බලය හෙබවූ භාරතීය ජනතා පක්ෂයට හා ජනතා දාල් පක්ෂයට ආසන 40 බැගින් හිමිවිය.

මීට පෙර කොංග‍්‍රස් පක්ෂයට කර්ණාටක ප‍්‍රාන්තයේ බලය හිමි වී තිබුණේ 1999 වසරේදීය. එම මැතිවරණයේදී ආසන 139ක හිමි කර ගැනීමට කොංග‍්‍රසය සමත් විය. 2004 වසරේදී පැවැති මහමැතිවරණයේදී ආසන 79 ක් හිමිකර ගත් කොංග‍්‍රසයට ජනතා දාල් පක්ෂය හා එක්වී සන්ධානයකට එළඹීමට සිදුවිය. 
2008 වසරේදී පැවැති කර්ණාටක ප‍්‍රාන්ත මැතිවරණයෙන් පසු බලයට පත් වූයේ භාරතීය ජනතා පක්ෂයයි. 

ඉන්දියාවේ අටවැනි විශාලතම ප‍්‍රාන්තය ලෙස සැලකෙන කර්ණාටක ප‍්‍රාන්තය ජනගහනය අතින් නව වැනි විශාලතම ප‍්‍රාන්තය ද වෙයි.

කොංග‍්‍රස් පක්ෂ ආධාරකරුවෝ ජයග‍්‍රහණය සමරමින්...