බන්ධනාගාරගතව සිටින පාකිස්තාන හිටපු අග්‍රාමාත්‍ය ඉම්රාන් ඛාන් දින 14 ක කාලයක් රක්ෂිත බන්ධනාගාරගත කරන්නැයි පාකිස්තාන ත්‍රස්ත විරෝධී අධිකරණය නියෝග කර ඇත. ඒ, ‘තරීක් ඊ ඉන්සාෆ්’ පක්ෂය පසුගිය දින කීපයේ සිදු කළ විරෝධතා සම්බන්ධයෙනි.

‘තරීක් ඊ ඉන්සාෆ්’ විරෝධතා පවත්වන්නේ, බන් ධනාගාරගතව සිටින ඉම්රාන් වහා නිදහස් කරන්නැයි පාකිස්තාන රජයට බලපෑම් කරමිනි. ‘තරීක් ඊ ඉන්සාෆ්’ පක්ෂයේ විරෝධතා හේතුවෙන් පසුගිය දා ඉස්ලාමාබාද් අගනුවර ‘ලොක්ඩවුන්’ කෙරුණු බව ද පැවැසෙයි. විරෝධතා පාලනය කිරීමට හමුදාව යෙදවිණි.

පාකිස්තාන මාධ්‍ය වාර්තා පැහැදිලි කර ඇති ආකාරයට ඉම්රාන්ගේ ‘තරීක් ඊ ඉන්සාෆ්’ පක්ෂය මෑතදී කළ විරෝධතා සම්බන්ධයෙන් නඩු හතකට අදාලව හිටපු අග්‍රාමාත්‍යවරයා දින 14 ක කාලයක් රක්ෂිත බන්ධනාගාරගත කරන්නැයි අධිකරණය නියෝග කර ඇත.
එම විරෝධතා මෙහෙයවීම සිදු කළේ යැයි ඉම්රාන් ඛාන්ගේ බිරිඳ බුෂ්රා බීබීට ද චෝදනා එල්ල වී ඇත. 

‘තරීක් ඊ ඉන්සාෆ්’ යනු ඉම්රාන් ඛාන් විසින් පිහිටුවනු ලැබූ දේශපාලන පක්ෂයයි. බිරිඳ බුෂ්රා බීබී චෝදනා නගා ඇත්තේ ‘තරීක් ඊ ඉන්සාෆ්’ පක්ෂයේ ජ්‍යෙෂ්ඨ නායකයන්, විරෝධතා නිසි පරිදි මෙහෙයවීමට කටයුතු නොකළ බවය.