ඇමෙරිකාවේ හාවඩ් විශ්වවිද්‍යාලයට ලබා දී තිබෙන බදු සහන ඉවත් කරන බවට ඇමෙරිකන් ජනාධිපති ඩොනල්ඩ් ට්‍රම්ප් තර්ජනය කර ඇත. ඇමෙරිකා ජනාධිපතිවරයා මෙසේ තර්ජනය කර ඇත්තේ විශ්ව විද්‍යාලයේ පරිපාලනය සමඟ මත ගැටුමක් ඇතිකර ගැනීමත් සමඟය.

 හාවඩ් යනු ඇමෙරිකා එක්සත් ජනපදයේ ප්‍රමුඛතම විශ්ව විද්‍යාලයයි. විශ්ව විද්‍යාලයේ ඉගැන්වීම් කටයුතු විදිමත්ව සිදු කරන මෙන් සහ ඊශ්‍රායලයට එරෙහිව පලස්තීනයට සහාය දක්වමින් විශ්ව විද්‍යාල පරිශ්‍රයේ සිදුවන ශිෂ්‍ය විරෝධතා මර්දනය කරන මෙන්ට්‍රම්ප් විශ්ව විද්‍යාල පරිපාලනයෙන් ඉල්ලීමක් කර ඇති අතර විශ්ව විද්‍යාල පරිපාලනය ඊට විරෝධය පළ කළ බැවින්, බදු සහන ඉවත් කරන බවට ට්‍රම්ප් තර්ජය කර ඇත.

දේශපාලන කටයුතුවලට මැදිහත් නොවන බව පවසා ඇති ඇමෙරිකාවේ හිටපු ජනාධිපතිවරයකු වන බැරැක් ඔබාමා පවා, ට්‍රම්ප් විශ්ව විද්‍යාලයට මෙසේ බලපෑම් කිරීම සම්බන්ධයෙන් සමාජ මාධ්‍ය ඔස්සේ සිය අප්‍රසාදය පළ කර ඇතැයි පැවැසෙයි. හාවඩ් විශ්ව විද්‍යාලය යනු ඇමෙරිකාවේ ප්‍රමුඛතම විශ්ව විද්‍යාලවලින් එකකි.

 (ඒ.එෆ්.පී.)