සෝමාලියා ජනපති ෂරිෆ් ෂීක් අහ්මඞ් ගමන් කළ සන්නද්ධ රථ පෙළ වටකොට අල් ෂෙබාබ් සටන්කාමීන් පෙරේදා (29) ප‍්‍රහාරයක් එල්ල කළත් දිවි බේරා ගැනීමට ජනපතිවරයා සමත් වූයේය. අල් ෂෙබාබ් යනු අල් කයිඩා සංවිධානය සමඟ ද සම්බන්ධකම් පවත්වන සෝමාලියාවේ කි‍්‍රයාත්මක ඉස්ලාමීය සටන්කාමී සංවිධානයකි. ජනාධිපතිවරයා ඉලක්ක කරගෙන එල්ල කළ එම ප‍්‍රහාරයෙන් ජනපතිවරයාගේ ආරක්ෂාවට සිටි සෝමාලි හමුදා සෙබළු දෙදෙනෙක් ජීවිතක්ෂයට පත්වූහ. ප‍්‍රහාරය එල්ල වූයේ ජනපතිවරයා රැගත් රථ පෙළ අලමාදා ප‍්‍රදේශය හරහා යද්දීය. අවි ගැටුම් නිසා උන්හිටිතැන් අහිමි වූවන් ජීවත් වන්නේ අලමාදා ප‍්‍රදේශය පිහිටා ඇති සරණාගත කඳවුරුවලය. ජනපතිවරයා එම ප‍්‍රදේශයට ගියේ ද අවතැන් වූවන් හමුවීමටය. ජනාධිපතිවරයාගේ රථ පෙළට ආරක්ෂාව සපයනු ලැබුවේ අප‍්‍රිකා සංගමයේ භට පිරිස් විසිනි. සටන්කාමීන් පහර දුන් අවස්ථාවේදී ප‍්‍රතිප‍්‍රහාර එල්ල කරමින් ජනපතිවරයා ආරක්ෂා කළේ එම සෙබළුන්ය.