මහා බ්‍රිතාන්‍යය, යුරෝපා සංගමයෙන් ඉවත් වීම හෙවත් 'බ්‍රික්සිට්' ක්‍රියාවලියට මෙහෙය වූ බ්‍රිතාන්‍යයේ 'බ්‍රික්සිට්' අමාත්‍යවරයා ලෙස කටයුතු කළ ඩේවිඩ් ෆරොස්ට් එම ධුරයෙන් ඉල්ලා අස්විය.

බ්‍රිතාන්‍ය අග්‍රාමාත්‍ය බොරිස් ජොන්සන්ගේ රජය ගැන කලකිරීමෙන් තමා ඉල්ලා අස්වන බව ඩේවිඩ් ෆරොස්ට් මාධ්‍ය හමුවේ පවසා තිබේ.

මේ වනවිට බ්‍රිතාන්‍ය අග්‍රාමාත්‍ය ජොන්සන් ප්‍රමුඛ ඔහුගේ කොන්සවර්ටිව් පක්ෂ රජය දේශපාලනික අර්බුදයකට මුහුණ දෙයි. ජොන්සන්ගේ නායකත්වය ද ප්‍රශ්න කිරීමට ලක් වෙයි.

ඊට ප්‍රධානතම හේතුව වී ඇත්තේ බ්‍රිතාන්‍යයේ දරුණු කොවිඩ් 19 රැල්ලක් ආරම්භ වී තිබීමත්, ඔමික්‍රෝන් විකෘතිය එරට ව්‍යාප්තවීමත්ය.

ඩේවිඩ් ෆරොස්ට්, 'බ්‍රික්සිට්' අමාත්‍යවරයා ලෙස පත් කළේ ද අග්‍රාමාත්‍ය ජොන්සන්ය. මහා බ්‍රිතාන්‍යය යුරෝපා සංගමයෙන් ඉවත් වීමෙන් පසු, මහා බ්‍රිතාන්‍යය සහ යුරෝපා සංගමය අතරේ ගනුදෙනු සිදුවන ආකාරය ගැන සැලැසුම් සකස් කළ තැනැත්තා වන්නේ ද ඩේවිඩ් ෆරොස්ට් ය.

ඩේවිඩ් ෆරොස්ට් සිය ධුරයෙන් ඉල්ලා අස්වීමත් සමඟ 'බ්‍රික්සිට්' ක්‍රියාවලියේ ඉදිරි වැඩපිළිවෙළ අවිනිශ්චිත යැයි දේශපාලන විශ්ලේෂකයෝ පෙන්වා දෙති.

(බීබීසී)