රුසියන් ජනාධිපති ව්ලැදිමීර් පුටින්, දෙදින නිල සංචාරයක් සඳහා අසර්බයිජානයට පැමිණියේය. පුටින්, අසර්බයිජානයේ නිල සංචාරයකට පැමිණියේ වසර 6 කට පසුව යැයි ද පැවැසෙයි. අසර්බයිජානය යනු මධ්‍යම ආසියාවට අයත් රාජ්‍යයකි.

අසර්බයිජානයේ බාකු අගනුවරට පැමිණි රුසියන් ජනාධිතිවරයා පිළිගනු ලැබුවේ, එරට ජනාධිපති ඉල්හාම් අලියේව් විසිනි. අසර්බයිජාන් ජනාධිපතිවරයාගේ මන්දිරයේ දී පුටින් වෙනුවෙන් විශේෂ භෝජන සංග්‍රහයක් ද පැවැත්විණි.

අසර්බයිජානය සහ අසල්වැසි ආමේනියාව අතරේ දේශසීමා අර්බුදයක් පවතී. ඒ දෙපාර්ශ්වයම අයිතිය ඉල්ලන නගොර්නෝ කරබාක් පළාත මුල්කොට ගනිමිනි. මෙම අර්බුදය සම්බන්ධයෙන් ද පුටින් සහ ඉල්හාම් අලියේව් අතරේ සාකච්ඡා පැවැත්විණි. කලාපීය අර්බුද සම්බන්ධයෙන් පමණක් නොව, ගෝලීය අර්බුද සම්බන්ධයෙන් ද රාජ්‍ය නායකයන් දෙදෙනාගේ අවධානය යොමු විය.

(ඒ.එෆ්.පී.)