ඇමෙරිකන් ජනාධිපති, ජෝ බයිඩන්, සිය වාර්ෂික වෛද්‍ය පරීක්ෂණයට පෙනී සිටියේය. 81 හැවිරිදි බයිඩන්ගේ, ශරීර සෞඛ්‍යය, ඔහුගේ වයසට අනුව, යහපත් බවත්, ඔහුට දිගටම ජනාධිපති ධුරයේ රැඳී සිටීමට ගැටලු කිසිවක් නොමැති බවත් වෛද්‍ය පරීක්ෂණයේ දී අනාවරණය විය.

වයසත් සමඟ බයිඩන් මුහුණ දෙන ශාරීරික දුර්වලතාවලට ඔහු නොකඩවා ඖෂධ ලබා ගන්නා බව ද වෛද්‍ය පරීක්ෂණයේ දී අවධානයට ලක් විය. වොෂින්ටන් වෝල්ටර් රීඞ් වෛද්‍ය මධ්‍යස්ථානයේදී, වෛද්‍ය පරීක්ෂණය සිදු කළේ ධවල මන්දිර වෛද්‍යවරයාගේ මැදිහත් වීමෙනි.

අවුරුදු 81 ක් වුවත්, තමන් තරුණයකු මෙන් නිරෝගීව සිටිනවා යැයි වෛද්‍ය පරීක්ෂණයේ ප්‍රතිඵල නිකුත් කරමින් වෝල්ටර් රීඞ් දෛ්‍ය මධ්‍යස්ථානයේ වෛද්‍යවරුන් තමන්ට විහිළු කළ බව ද බයිඩන් මාධ්‍ය හමුවේ පවසා තිබේ.

වාර්ෂිකව ඇමෙරිකන් ජනාධිපතිවරයා කායික සහ මානසික වෛද්‍ය පරීක්ෂණයකට යොමු කිරීම ඇමෙරිකාවේ සම්ප්‍රදායයි. බයිඩන්, එලැඹෙන නොවැම්බර් මාසයේ පැවැත්වෙන ඇමෙරිකන් ජනාධිපතිවරණයට ඉදිරිපත් වෙයි. ඒ දෙවැනි ධුර කාලය වෙනුවෙනි.

ඇමෙරිකාවේ ජනාධිපති ධුරයට පත් වුණු වයස්ගතම ජනාධිපතිවරයා වන්නේ ද බයිඩන්ය. බයිඩන්ට අභියෝගයක් වනු ඇත්තේ ප්‍රතිවාදී රිපබ්ලිකන් පක්ෂ අපේක්ෂක 77 හැවිරිදි ඩොනල්ඞ් ට්‍රම්ප්ය.

(ඒ.එෆ්.පී.)