ඉන්දියාවේ ජාතික ගුවන් සේවාව වන 'එයාර් ඉන්දියා' ගුවන් සමාගම, එම ගුවන් සමාගම පිහිටුවූ එරට ප්‍රමුඛ පෙළේ ව්‍යාපාරික ආයතනයක් වන ටාටා සමූහය විසින් මිලදී ගනු ලැබ ඇත.

ඉන්දීය කෝටිපති ව්‍යාපාරික රතන් ටාටා සභාපතිත්වයෙන් හිමි ටාටා සමාගම ඉන්දීය රුපියල් කෝටි 18,000 ක් හෙවත් ඇමෙරිකානු ඩොලර් බිලියන 2.4 ක මුදලකට එයාර් ඉන්දියා ගුවන් සේවය මිලදී ගෙන ඇති බවද ඉන්දීය මාධ්‍ය වාර්තා සදහන් කරයි.

එයාර් ඉන්දියා සමාගම ටාටා සමුහය විසින් 1932 දී පිහටවූ ගුවන් සමාගමක් වන  අතර 1953 දී එවකට පැවති  අගමැති ජවහල්ලාල් නේරු අග්‍රාමාත්‍යවරයාගේ නායකත්වයෙන් යුතු  ඉන්දීය රජය විසින් එය ඔවුන් යටතට පවරා ගනු ලැබීය. මේ වන විට එයාර් ඉන්දියා ගුවන් සේවා සමාගම සතුව ඇති ගුවන් යානා සංඛ්‍යාව 141 කි.

එයාර් ඉන්දියා ගුවන් සමාගම මෑතකාලීනව දිගින් දිගටම පාඩු ලැබූ අතර සමාගමේ කොටස් විකිනිමට උත්සාහ දැරුවද එය ද සාර්ථක නොවීය.එසේම කොවිඩ් වසංගත තත්ත්වය පැමිණීමට පෙර සිට එයාර් ඉන්දියා පාලනාධිකාරිය එහි ගුවන් නියමුවන් ඇතුළු එහි සේවකයින්ට නිසි පරිදි වැටුප් නොගෙවීම නිසා වරින් වර එහි කාර්ය මණ්ඩලය වැඩ වර්ජන ක්‍රියාමාර්ග වලද නිරත විය.

මේ අතර මෙම මිළදී ගැනීමත් සමග ඉන්දීය ප්‍රමුඛ ව්‍යාපාරික රතන් ටාටා මහත් විසින් සිය ට්විටර් ගිණුමේ සටහනක් තබමින් '' එයාර් ඉන්දියා නැවතත් පිළි ගනිමි යැයි සදහන් කර තිබිණි.

(එන්.ඩී.ටීවී.)