උතුරු දිග ඉතාලියට බලපෑ රික්ටර් පරිමාණයේ ඒකක 6ක ප‍්‍රබලත්වයකින් යුතු භූකම්පනයකින් පුද්ගලයන් හයදෙනකු ජීවිතක්ෂයට පත්ව 50 දෙනකු පමණ තුවාල ලබා ඇතැයි එරට ආපදා කළමනාකරන අංශ සඳහන් කරයි. වසර තුනකට පසුව ඉතාලියට බලපෑ ප‍්‍රබලතම භූ කම්පනය ලෙස සැලකෙන මෙම භූකම්පනයෙහි අපිකේන්ද්‍රය පිහිටා ඇත්තේ බොලොග්නා නගරයට සැතපුම් 22ක් වයඹදිගින් පිහිටි ස්ථානයක බව විද්‍යාඥයෝ පවසති. භූ කම්පනය හටගත් අවස්ථාවේදී ශාන්ත අගුස්ටීනෝ ප‍්‍රදේශයේ පිහිටි පිඟන් භාණ්ඩ කම්හලක් කඩා වැටීමෙන් පුද්ගලයන් දෙදෙනකු මිය ගොස් ඇති බව වාර්තා වේ. මීට අමතරව ෆෙරාරා ප‍්‍රදේශයේ දේවස්ථානවල පිහිටි ඝණ්ටාර කුලූණු සහ මධ්‍යතන යුගයට අයත් ඉපැරැණි ගොඩනැගිලිවලට දැඩි හානි සිදුව ඇතැයි විදෙස් වාර්තා සඳහන් කරයි. 2009 වසරේ ඉතාලියට බලපෑ රික්ටර් මාපකයේ ඒකක 6.3ක් සටහන් කළ භූකම්පනයෙන් පුද්ගලයන් 300ක් ජීවිතක්ෂයට පත් වූහ.