අප්‍රිකා රටවල වැසියන්ට, සති 6 ක් ඇතුළත, 'ඇස්ටාසෙනකා' එන්නතේ දෙවැනි මාත්‍රා මිලියන 20 ක් අවශ්‍ය යැයි ලෝක සෞඛ්‍ය සංවිධානය පෙන්වා දෙයි.

අප්‍රිකාවේ දිළිඳු රටවල් බොහොමයකට 'ඔක්ස්ෆර්ඩ් ඇස්ට්‍රාසෙනකා' එන්නත ලැබුණේ ලෝක සෞඛ්‍ය සංවිධානයේ 'කොවැක්ස්' වැඩසටහන හරහා නොමිලේය.

එම රටවල් ලැබුණු එන්නත් මාත්‍රා සියල්ල පළමු මාත්‍රාව ලෙස ලබා දීම කළේ, දෙවැනි මාත්‍රාවට එන්නත් ලැබෙනු ඇතැයි විශ්වාසයෙනි.

ලෝක සෞඛ්‍ය සංවිධානය අප්‍රිකා රටවලට ලබා දුන්නේ 'ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්' එන්නතය. 'ඔක්ස්ෆර්ඩ් ඇස්ට්‍රාසෙනකා' ඉන්දියාවේ නිපදවන්නේ මෙම 'කොවිෂීල්ඩ්' නාමය යටතේය.

ඉන්දියාව මේ වනවිට එරට නිපදවන එන්නත් අපනයනය නවතා ඇත්තේ ඉන්දියානුවන්ට ප්‍රමුඛතාවක් ලබා දිය යුතු බැවිනි.

දෙවැනි මාත්‍රාව සඳහා 'ඔක්ස්ෆර්ඩ් ඇස්ට්‍රාසෙනකා' එන්නත් ගැටලුවක් වී ඇත්තේ මේ නිසාය.

මේ වනවිට රුධිර කැටි ගැසීම හේතුවෙන් යුරෝපා රටවල් පමණක් නොව ඇමෙරිකාව ද එම රටවල නිපදවන 'ඔක්ස්ෆර්ඩ් ඇස්ට්‍රාසෙනකා' එන්නත් එම රටවල ජනතාවට ලබා දෙන්නේ නැත.

එසේ ඉතිරි වී ඇති එන්නත් එන්නත් පරිත්‍යාග වශයෙන් ලෝක සෞඛ්‍ය සංවිධානයට ලැබීමට නියමිත බවත්, ඒවා කඩිනමින් අප්‍රිකා රටවලට බෙදා දීමට කටයුතු කරන බවත් ලෝක සෞඛ්‍ය සංවිධානයේ අප්‍රිකා කලාපය බාරව කටයුතු කරන වෛද්‍ය මට්ෂිඩිසෝ මොයේටි මාධ්‍ය හමුවේ පවසා ඇත.

ජොහැන්නස්බර්ග්හිදීය (රොයිටර්)