එළඹ ඇත ශිශිරය නියතවම

අතුරුදන්ය සුදුමල්

සදාහරිත පඳුරේ.

ගින්කෝ* තුරුපෙළ හැරී ඇත

ඉදල් බවට

එළඹ ඇත ශිශිරය

ඉතියුණු කාවැදීමක් ලෙස,

නොරිසිය සැමකෙකුට ශිශිරය,

තෘණෙන් හා තුරෙන් තොර වූ.

කෘමිසතුන් මඟ හැරී

ශිශිරය එළඹ ඇත.

ශිශිරය ,

එන්න මා වෙත, එන්න මා වෙත

ශිශිරයේ සවිය මා සතුය

ශිශිරය මගේ ගොදුරය.

සපුරාම පැතිරෙන්න, තුළටම කාවදින්න

ගිනි නිවා දමන්න , හිම සමඟ වැළලෙන්න

එළඹ ඇත ශිශිරය , මුවහත් පිහියක් ලෙස

*ගින්කෝ - 'gin kyo' (Silver Apricot) යන ජපාන වදන විකාශයේදී මේ නම සැදී ඇතැයි කියැවේ. Ginko Biloba යන විද්‍යාත්මක නමින් හැඳින්වෙන , මීටර් 20-35 පමණ උසට වැඩෙන ගසකි.

ජපන් කිවිවර කෝතාරෝ තකමුරා ( ‪1883-1956‬) ලියූ Winter has come පද්‍යයේ පරිවර්තනය
 

ප්‍රකට මූර්ති ශිල්පියකුගේ පුත්‍රයා වූ තකමුරා මුලදී ලියා ඇත්තේ ' තන්කා' වර්ගයේ කවි පමණි. එහෙත් මූර්ති ශිල්පය හැදෑරීම පිණිස 1906දී ඇමෙරිකාවට ගිය විට වෝල්ට් විට්මන්ගේ කවි කියවා නිදහස් කවි ලිවීම අරඹා ඇත. ජපානයට පෙරළා පැමිණි පසු ඔහු දැඩි මානවවාදියකු ලෙස පිළිගැනී ඇත. සිය බිරිය චීකෝ සත්වසක් උමතු තත්ත්වයෙන් සිට මිය ගිය පසු කවියා ඇය වෙනුවෙන් ලියූ පද්‍ය ග්‍රන්ථය ඔහුගේ වඩාත්ම ජනප්‍රිය කෘතිය විය. ඊට අමතරව හයක් පමණ වූ ඔහුගේ අනෙක් පද්‍ය කෘතින් හා ජීවිත කාලය පුරා කළ මූර්ති නිර්මාණ වෙනුවෙන්ද ඔහු ගෞරවයට පාත්‍ර විය.