එංගලන්තයේ දී වසර 10 කට පසුව ටෙස්ට් ජයක් ලැබීමෙන් කීර්තිය දිනාගත් ශ්‍රී  ලංකාව පසුගිය සතියේ දී එවැනිම කීර්තිමත් ක්‍රීඩා ජයග්‍රහණ දෙකක් අත් කර ගැනීමට සමත් විය. ශ්‍රී ලංකා මල්ලවපොර ක්‍රීඩිකා නෙත්මී අහිංසා ප්‍රනාන්දු ස්පාඤ්ඤයේ දී ලෝක ශූරතා ලෝකඩ පදක්කමක් දිනා ගැනීම ඉන් එක් සිදුවීමකි.

දෙවැනි සිදුවීම ශ්‍රී ලංකා පාපන්දු  කණ්ඩායමෙනි. කාම්බෝජයට ගොස් එරට පාපන්දු  කණ්ඩායම පරාජය කරමින් ආසියානු කුසලාන ( 2027 - රියාද් ) කාණ්ඩ තරග වටයට නිර්දේශ  ලබාගැනීමට ශ්‍රී ලංකාව සමත්වීම විශ්මිත ජයග්‍රහණයක් විය.

ස්පාඤ්ඤයේ දී නිමාවට පත්වූ ලෝක ශූරතා  (වයස 20 න් පහළ) මල්ලවපොර  තරගාවලියේ දී කිලෝග්‍රෑම් 53 බර පංතිය (කාන්තා) ඉසව්වෙන් ලෝකඩ පදක්කම දිනාගැනීමට සමත්වූ ශ්‍රී ලංකා ක්‍රීඩිකා 20 හැවිරිදි  නෙත්මී අහිංසා ප්‍රනාන්දු  එහිදී  රුසියානු ක්‍රීඩිකා වැලේරියා මිකිට්සිච් පරාජය කළේ ලකුණු 6 - 2 කටය.

මෙය ශ්‍රී ලාංකිකයෙකු විසින් ලෝක ශූරතා මල්ලවපොර තරගාවලියක දී දිනාගත් පළමු පදක්කම ලෙස ඉතිහාසගත වේ. මෙම ක්‍රීඩිකාව මීට පෙර  ඉහළම අවධානය  දිනාගත්  අවස්ථාවක් වූයේ 2022 බර්මින්හැම් පොදු රාජ්‍ය  මණ්ඩලීය ක්‍රීඩා  උළෙලේදී  කිලෝග්‍රෑම්  57 බර පංතියෙන්  ලෝකඩ පදක්කමක් දිනාගැනීමයි.

එවිට නෙත්මී මාකඳුර වෙල්ලපල්ල  සංඝරතන මහ විදුහලේ ඉගෙනුම ලබමින් සිටි 18 හැවිරිදි  පාසල්  සිසුවියකි. ඒ හේතුවෙන් ඇය සැළකුවේ එතෙක්  පොදු රාජ්‍ය මණ්ඩලීය ක්‍රීඩා උළෙලක දී පදක්කමක් දිනූ ළාබාලතම ශ්‍රී  ලාංකිකයා ලෙසයි.

ඇයට නිමාවූ පැරිස් ඔලිම්පික් නිර්දේශ අහිමිවූයේ යන්තමිනි. ඇයගේ ක්‍රීඩා  දිවියට දිරිදෙන ශ්‍රී ලංකා මල්ලවපොර සම්මේලනයේ  වත්මන් සභාපති සරත් හේවාවිතාරණ මහතා පැවැසුවේ මීළඟ (2028  - ලොස් ඇන්ජලීස්) ඔලිම්පික්  උළෙලට නෙත්මී නිසැකවම නිර්දේශ  ලබාගන්නා බවයි.

ස්පාඤ්ඤයේ දී නෙත්මී පළ කළ දස්කම් ඉහළම අගයක් ගත්තේය. ඇය  මූලික වටයේ සිට ඉදිරියට යාමේ තරග පහෙන් හතරක්ම ජයගත්තාය. පරාජයට පත්වූ අවසන් පූර්ව  තරගයත්  ඇය සම කිරීමට සමත්වූවත් තීරක ලකුණ ප්‍රතිවාදී චීන ක්‍රීඩිකාවට හිමිවීමෙන් ඇයට රන් පදක්කම හෝ නිසැකවම රිදී  පදක්කම හිමි වන අවසන්  තරගය අහිමි වූවාය.

ඒ අනුව මූලික වටයේ සිට කසකස්ථානය, බල්ගේරියාව, හංගේරියාව හා රුසියාව යන රටවල ක්‍රීඩිකාවන් පරාජය කරමින් නෙත්මී ශ්‍රී ලංකාවට පළමු ලෝක ශූරතා මල්ලවපොර පදක්කම ලැබදුන්නාය. එහිදී පසුගිය කාලය පුරා ඇය අත් කර ගත් ජාත්‍යන්තර  ජයග්‍රහණ පිටුපස හස්තය වූයේ ඇගේ පෞද්ගලික  පුහුණුකරු  සුරංග කුමාර මහතාය.

වසර 2017 සිට නෙත්මී අහිංසාගේ පුහුණුකරු ලෙස කටයුතු කරන සුරංග කුමාර මහතා ඉරිදා ලංකාදීපයට මෙසේ පැවසීය.

"මීට කලින් ශ්‍රී ලංකාව නොගත් ඉහළම ජාත්‍යන්තර පදක්කම් තුනක් නෙත්මී දිනා ගත්තා.ඒ  හැම අවස්ථාවකදීම ඇගේ පුහුණුකරුවීම ගැන මම සතුටූ වෙනවා.ක්‍රීඩා  අමාත්‍යාංශය වගේම ජාතික  ඔලිම්පික්  කමිටුව එතනදී නෙත්මීට දක්වපු සහයෝගය හා අනුග්‍රාහය  මමත් නෙත්මිත් ඉහළින්ම අගය කරනවා.

ශ්‍රී ලංකාවට ජාත්‍යන්තර  පාපන්දු  පිටියේ ශ්‍රී  ලංකාව පසුගිය සතියේ දී හොඳ නමක් තිබුණේම නැත. එය කෙතෙක්ද යත් මේ වනවිටත් ශ්‍රී ලංකාව ආසියානු ශ්‍රේණිගත  කිරීම් අනුව පසුවන්නේ අවසන් (46) වැනි ස්ථානයේය. ලෝක ශ්‍රේණිගත කිරීම් අනුවත් දැන් පසුවන්නේ 205 වැනි ස්ථානය තරම් ඉතා පහළකය. ශ්‍රී ලංකාව  1995 න් පසුව මෙතෙක් ජාත්‍යන්තර  පාපන්දු  ශූරතාවක් දිනා ඇත්තේ ද නැත.

පොන්ම් - පෙන් නුවරදී ශ්‍රී ලංකා පාපන්දු  කණ්ඩායම

මෙවන් පසුබිමක ශ්‍රී ලංකා පාපන්දු ආයතනය සුදු අලියෙකුගේ තත්වයට පත්ව ඇතැයි නිරන්තරයෙන්  චෝදනා  එල්ලවෙමින් තිබියදී  ශ්‍රී ලංකාව පොන්ම් - පෙන් නුවරටම ගොස් කාම්බෝජය පරාජය කිරීමට සමත්වීම කිසිසේත් ලඝු කළ නොහැකිය.

දෙරට අතර කොළඹ දී  පැවැති තරගය සම වෙමින් අවසන්වීමත් මෙහිදී  ශ්‍රී ලංකාව ලද එක්තරා ජයග්‍රහණයකි. පරාජය නොවී අඩුතරමින් එම තරගය සම කිරීමෙන් ශ්‍රී  ලංකාවට දෙවැනි තරගයේ බලාපොරොත්තු ඇති කර සිටියේය. ශ්‍රී ලංකා පාපන්දු  කණ්ඩායමේ  අළුත් වෙනසක් අපේක්ෂාවෙන් එහි වත්මන් සභාපති  ජස්වර් උමාර් මහතා ගත් විකල්ප උත්සහයක් ලෙස එතෙර පදිංචිව සිටින ශ්‍රී ලාංකික සම්භවයකින් යුත් ද්විත්ව  පුරවැසියන් වන ක්‍රීඩකයන් ජාතික පාපන්දු  සංචිතයට කැඳවීය.

එය සාර්ථක  උත්සහයක් ලෙස පෙනුණේ මෙම කාම්බෝජ  තරග සංචාරයේ දී ය. විනාඩි 120 ක් පුරා ඇදුණු තරගය  එම 120  වැනි විනාඩිය දක්වා  ජයගෙන තිබුණේ ගෝල 2 - 1 ක් ලෙස කාම්බෝජයයි. නමුත් අපතේ ගිය කාලය වෙනුවට ලබාදුන් අතිරේක 122 වැනි විනාඩියේ දී වාර්තා  කළ ගෝලය කාම්බෝජයේ ජය උදුරා ගැනීමක් විය. අවසන් ප්‍රතිපලය වූයේ සමවූ තරගය දඬුවම් පහර මත තීරණය කිරීමයි. එහිදීත් උසස් දක්ෂතා පළ කළ ශ්‍රී  ලංකා ක්‍රීඩකයන් 4 - 2 කට තරගය ජය ගත්තේ  ඒ වන විට ලෝක ශ්‍රේණිගත  කිරීම අනුව 180 වැනි ස්ථානයේ  පසුවූ කාම්බෝජය සිය රටේදීම පසුබස්වමිණි.

එහිදී  ශ්‍රී ලංකා කණ්ඩායමේ නායක  සුජාන් පෙරේරා නිත්‍ය දැල් රකින්නා ලෙස දැක්වූ විශිෂ්ට දක්ෂතා කාම්බෝජ ක්‍රීඩකයන් තිදෙනෙකුම පරාජයට පත් කළේය. ශ්‍රී ලංකාව වාර්තා කළ ගෝල දෙකම එතෙරින් කැඳවූ ශ්‍රී ලාංකික ද්විත්ව පුරවැසිලාභීන් වන ක්‍රීඩකයන් විසින් ලබාගැනීමෙන් ජස්වර් උමාර් මහතාගේ  උත්සහයක් සාර්ථක වෙමින්  තිබේ.

කාම්බෝජය මීට පෙර මුණගැසුණු 2016 දී ශ්‍රී ලංකාව ගෝල 4 - 0 කින් පරාජයවී තිබේ. ශ්‍රී ලංකාව අවසන් තරග ජයග්‍රහණය  මෙම වසරේදීම මාර්තු මාසයේ දී භූතානයට එරෙහිව (2 - 0) වාර්තා කර ඇත. විදේශයක දී ශ්‍රී ලංකාව මීට පෙර ජාත්‍යන්තර  පාපන්දු  තරග ජයක් වාර්තා කර ඇත්තේ 2018 බංගලාදේශයේ දී ය.

වසර 2020 සිට මේ දක්වා ශ්‍රී ලංකාව සහභාගිවූ  ජාත්‍යන්තර  පාපන්දු  තරග 22 කදී ජය ගෙන ඇත්තේ  තුනක් පමණි. හයක් සම කර ඇත. සෙසු සියලු තරග පරාජයට පත්ව තිබේ. මේ දක්වා ශ්‍රී ලංකාව ජාත්‍යන්තර පාපන්දු  තරග 258 ක දී ජයගෙන ඇත්තේ 50 ක් පමණි. ජය පරාජයෙන් තොර තරග ගණන 45 කි. 

ඒ අනුව ඉතිරි තරග 153 ක්ම පරාජයවී තිබේ. එසේ බලන විට ශ්‍රී ලංකාවේ ජාත්‍යන්තර  පාපන්දු වංශ කථාව යහපත් තත්වයක නැත. අන්තර්ජාතික පාපන්දු  සම්මේලනය වාර්ෂිකව ප්‍රතිපාදන ලබාදෙන ප්‍රමාණයට ශ්‍රී ලංකාවේ පාපන්දු  ක්‍රීඩාව දියුණුවී නැතැයි චෝදනා නැගෙන්නේ ඉහත  වංශ කථාව විමසීමේදීය.

ශ්‍රී ලංකා කණ්ඩායමේ පුහුණු කාර්‍ය්‍ය  මණ්ඩලයේ 10 දෙනාගෙන් හත් දෙනෙකු  විදේශිකයෝ වෙති. ප්‍රධාන පුහුණුකරු  ස්කොට්ලන්ත ජාතික ඇන්ඩි මොරිසන්  මහතා වෙනුවට දැන් වැඩ බලන්නේ කුවේට් ජාතික පුහුණුකරු  අබ්දුල්ලා අල් මුටායිරී මහතාය. කාම්බෝජ තරග සංචාරය ඔහුගේ  පෞද්ගලික  ජයග්‍රහණයක් ලෙසත් සැළකිය හැකිය.

නාමල් පතිරගේ