උපුල් වික්‍රමසිංහ
ශානි අබේසේකර ඇතුළු දක්ෂ විමර්ශකයන් යටතට සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග ඝාතන විමර්ශනය පත් කිරීමට සැලසුම් කර ඇති බව නම හෙළි කිරීමට අකමැති වූ අමාත්‍යවරයෙක් ඉරිදා ලංකාදීපයට පැවසීය.

ඒ අනුව පසුගිය කාලයේ දී විවිධ හේතු මත අපරාධ පරීක්ෂණ දෙපාර්තමේන්තුවේ විමර්ශන කටයුතුවලින් ඉවත් කෙරුණු දක්ෂ විමර්ශන නිලධාරීන් යටතට ලසන්ත ඝාතනය ඇතුළු ආන්දෝලනාත්මක ඝාතන සිදුවීම්වල විමර්ශන පත් කෙරෙනු ඇති බව ද එම අමාත්‍යවරයා කීවේය. 
එම නිලධාරීන් ලසන්ත ඝාතනය ඇතුළු ආන්දෝලනාත්මක ඝාතන සිද්ධිවලට අදාළ විමර්ශන මෙහෙයවමින් සිටිය දී පැවති ආණ්ඩු විසින් ඔවුන් ඒ විමර්ශනවලින් ඉවත් කරනු ලැබ එකී විමර්ශන ඉදිරියට යෑම වැළැක්වීමට පියවර ගත්ත ද වත්මන් රජය යටතේ අදාළ විමර්ශන කරගෙන යන බව ද හෙතෙම සඳහන් කළේ ය.