( පුෂ්පකුමාර මල්ලවආරච්චි)
 
පාසල් සිසුන්ට විදේශගතවීමට අවස්ථාව සලසා එම රටවලදී කී‍්‍රඩා පුහුණුව ලබාදෙන බව පවසා රුපියල් ලක්ෂ ගණනින් මුදල් ලබාගෙන අවසානයේ අගරු චෙක්පත් ලබාදී වංචා කළ  බව කියන පුස්තකාල සහායකයකු අද(23) අත්අඩංගුවට ගත් බව මීරිගම පොලිසිය කියයි.

මෙසේ අත්අඩංගුවට ගෙන ඇත්තේ නිට්ටඹුව ප‍්‍රදේශයේ පදිංචිකරුවකු වන, දිවයිනේ ප‍්‍රධාන දේශපාලන පක්ෂයක මීරිගම ආසනයේ සම්බන්ධීකාරයකු ලෙස කටයුතු කරන පුද්ගලයකු බව පොලිස් පරීක්ෂණවලදී හෙළිවී ඇත.
 
සැකකරු ගම්පහ දිස්තී‍්‍රක්කයේ ප‍්‍රධාන පෙළේ දේශපාලඥයකුගේ ඥාතියකු වන බවත්, මෙම සම්බන්ධතා නිසා විවිධ පුද්ගලයන් සැකකරුට දරුවන් කී‍්‍රඩා පුහුණුව සඳහා යොමු කිරීම වෙනුවෙන් මුදල් ලබාදී ඇති බවත් හෙළි වී ඇත.

පුද්ගලයන් ගණනාවකගෙන් මෙසේ මුදල් ලබාගෙන වංචා කර ඇතැයිද වේයන්ගොඩ ප‍්‍රදේශයේ පුද්ගලයකුගෙන් මීට වසරකට පමණ පෙර ලබාගත් රුපියල් 120,000 ක් වෙනුවෙන් අඟරු චෙක්පත් දීම සම්බන්ධයෙන් මෙම සැකකරු අත්අඩංගුවට ගත් බවද පොලිසිය කියයි.

මේ අතර මෙම සැකකරුගේ වංචාවන්ට හසුවූ අයෙකුගේ තවත් පැමිණිල්ලක් ලැබී ඇති අතර තවත් විශාල පිරිසක් මෙම අයගේ වංචාවන්ට ගොදුරුව ඇති බවට පොලිසියට තොරතුරු ලැබී ඇත. සැකකරු අධිකරණයට ඉදිරිපත් කිරීමට නියමිතය.